Agnethe Davidsen politikkimi sunniuteqarluarsimavoq

Agnethe Davidsen, 60-inik ukioqarluni toqusoq inunngorpoq Nuummi aggustip ulluisa 29-anni 1947-imi.

Agnethe Davidsen 1970-imi Danmarkimi niuernermik ilinniareerluni nunatta eqqartuussiviani sulilerpoq, kingornalu 1979-imi Nuummi eqqartuussisunngorluni.

1983-imi Siumut sinnerlugu inatsisartunut iserpoq, ukiorlu taanna Isumaginninnermut Naalakkersuisunngorluni, arnani siullersaalluni.

1989-imiit 1993-imut Nuummi eqqartuussisutut suleqqippoq, kommunalbestyrelsemi ilaasortaajutigaluni.

1993-imili ullumimut Nuummi borgmesteriuvoq.

Agnethe Davidsen inatsisartuni 1997-imi ilaasortaajunnaarallarpoq, kommunalpolitikeritut sulinini aallunnerujumallugu. 2005-imili qinigaaqqikkami, toqussi tikillugu Siumumi gruppeformandiuvoq.

Agnethe Davidsen 1997-imi Dannebrogimik saqqarmiulerneqarpoq.

Agnethe Davidsenip qimatarai qitornani inersimasut marluk, ernuttanilu.

Nuummi borgmesteriugallartutut inissippoq Malînánguaq Marcussen-Mølgaard, Agnethe Davidsenip ilisaanerata kingorna kommunalbestyrelsemi ataatsimiinnerup tungaanut borgmesteriussalluni, Sermitsiaq allaaserinnippoq.