Agnethe Davidsen: Isumaginninnermi sulisut ilumut akissarsialupput
Kommunimi sulisut ilumut akilernerlugaavallaartut Nuup Kommuneani borgmesterip isumaqatigaa.
- Isumaginninnermik siunnersortit pitsaanerusumik ullutsinnullu naleqquttumik akissarsiaqartinneqartariaqarput, Agnethe Davidsen oqarpoq.
Kommunimi isumaginninnermik siunnersortitut atorfillit akissaasersugaanerisa allanngortinneqarnissaat pillugu siunnersuummik piariikkamik Nuup Kommunea 2004-mili suliaqarpoq.
Isumaginninnermut ataatsimiititaliami siulittaasup, Ove Karl Berthelsenip, maanna kingumut siunnersuutigaa, siunnersortit ataatsimeeqatiserineqassasut, akissarsiamikkut pitsanngorsaavigineqarnissaat neqeroorutigineqarniassammat.
Agnethe Davidsenilli upperivallaanngilaa akissarsiat ajornartorsiutigineqarnerat ukioq manna iluarsiivigineqarsinnaasoq, isumaqatigiinniarnerimmi ukiaru aatsaat aallartissapput, naak isumaqatigiissut maanna atuuttoq ukioq manna apriilip naanerani atorunnaaraluartoq.
Isumaginninnermik siunnersortit peqatigiifffianni siulittaasoq, Vittus Poulsen, ilutigalugu oqarpoq, siunnersortit akissarsiaasa isumaqatigiinniassutigineqarnissaasa salliutippallaarneqarnissaat ilimaginngikkini.
