AGF pillugu nalunaarusiaq ersersitsinerluttuusimavoq
Arctic Green Food-ip aningaasanik ingerlatsinerlunneragaanini maanna utertippaa.
Inatsisartut aningaasaqarnermut Ataatsimiitialiaata Arctic Green Food sullissinissamik isumaqatigiissuteqarfiginissaa apeqqusernikuuaa, Naalakkersuisunut nalunaarusianik tunngaveqartumik isumaqaramik suliffeqarfiup aningaasaqarnini apequssinnaanngikkaa.
Kisianni Aalisarnermut, Piniarnermut Nunalerinermullu Naalakkersuisoqarfiup uppernarsarpaa, ersersisitsinerluttunik paasissutissiisoqarsimasoq.
Arctic Green Food-ip siulersuisuini siulittaasup, Charles Kastberg Christensen, unnerpaa, aningaasat suliffeqarfiup nammneq pigisai 8 millioner koruuninit amerlanerusut millinikuunngitsut suliffeqarfillu akiitsoqanngitsoq.
Soorlu Radioavisimi marlunngormat juulip 28-ani 2009 oqaluttuarisinnaagipput, Arctic Green Food-imut ukioq manna katillugit 12 millioner koruuninik naleqartussamik sullissinermut isumaqatigiissusiornissaq Aningaasaqarnermut ataatsimiititaliap apeqqusernartoqartissimavaa.
Atorfillit toqqaannaartumik inassutiginikuuaat, Arctic Green Food-ip siuttoqarnikkut aningaasaqarnikkullu inissisimanera maanna taamaatsillugu, pisortat aningaasaataannik tapiiffigineqassanngitsoq.
Taamaammat Aningaasaqarnermut ataatsimiititaliat nalornisunnguamik angerput, suliffeqarfik 7 millioner koruuninik ukiup sinneranut aningaasaliiffigineqassasoq.
Kisianni nunaqarfinni tunisassiorfiit pillugit suleqatigiissitat nalunaarusiaata eqqaariikkatta inerniliussai ersersitsinerluttumik tunngaveqartumik inerniliussaqartut maanna paasinarsivoq.
Nalunaarusiami erserpoq Arctic Green Foodip aningaasartuutai 2007-imiit 2008-imut qaffassimasut.
Kisianni taama inerniliineq tunngaveqarpoq, suliffeqarfiup 2008-imut ukiumoortumik nalunaarusiaani paasissutissat 2007-imi ukiup affaannaani ingerlatsinermi nalunaarusiamut naleqqersuunneqarsimammata.
- Taamaammat inerniliineq ersersitsinerluppoq, Charles Kastberg Christensen allappoq.
Taama oqarneq Aalisarnermut, Piniarnermut Nunalerinermullu Naalakkersuisoqarfiup uppernarsarpaa.
- ukioq isertitaqarfiusumi 2007-mi suliffeqarfik ukiup affaata missaannaani atasimasoq, nalunaarusiami qissimigaarneqarsimanngilaq. Taamaammat aningaasartuutit qaffakkiartornerarlugit nalunaarusiami oqarneq ersersitsinerluppoq, allaffimmi pisortaq Jørgen Olsen allappoq.
Naak aningaasaqarnertik ajunnginneraraluarlugu, Charles Kastberg Christensen ataasinngormat juulip 27-ani oqarpoq, sullissinermut isumaqatigiissuteqarnikkut suliffeqarfiup ukioq manna amigartooruteqarnissaa avaqqunneqarsinnaanngitsoq, pigisanik nalikillisaanissamut nutaanillu atortussarsinissamut akissaqanngimmat.
