AGF: KNI-p ingerlatsinerliornera uatsinnut tutsinneqarsinnaanngilaq
Ippassaq Radioaviisimi aningaasat tapiissutaasartut ikippallaat piniartunut tutsinneqartarnerannik, Agathe Fontainip oqaasii aamma Charles Kastbergip akerlilerpai.
Charles Kastberg oqarpoq, ukioq manna nunaqarfinni Arctic Green Foodimut tunineqarsimasut 10 milliuni koruunit pallillugit naleqartut, taakkualu tamarmik nunaqarfinni piniartunut akiliutigineqarsimasut. Taassuma saniatigut aasaanerani ulapaarfiunerata nalaani 115-inik, ulapaarfiujunnaarmallu 39-nik Arctic Green Food sulisoqarpoq. Taamaalilluni Arctic Green Food namminersorluni ingerlalerami sulisut akissarsiaannut 11,1 miliuuni koruuninik aningaasartuuteqarsimavoq. Ukioq manna januaarip aallartinneraniit novembarip naanerata tungaanut 15,7 milliuuni koruuninik tapiisoqarpoq, Arctic Green Foodilli piffissami tassani 21 milliuuni koruunit nalingi piniartunut sulisunullu akiliutigisimavai. Taakkualu saniatigut atortut nutarterrneqarnerannut suliffeqarfinnillu aserfallatsaaliinermut aningaasat aamma milliuuni koruunit sinnerlugit atorneqarput, suliassallu tamarmik sumiiffinni sanasunit suliarineqarlutik. Pilersaarutivut naapertorlugit aamma 2009-mi aningaasanik kaaviiaartitsinitta annertuumik qaffariarnissaat naatsorsuutigaarput, 2008-llu aallartinnerani kiffartuussinissamut isumaqatigiissummi piumasaqaataasut taamaalilluta naammassiniassallutigit, Charles Kastberg oqarpoq.
Agathe Fontainip isornartorsiuineranut pissutaasut ilagaat, soorlu Savissivimmi qilalukkap mattai kilomut 57 koruuniinnarnik akilerneqartarnerat. Tassungali tunngatillugu Charles Kastberg oqarpoq, Arctic Green Foodip KNAPK-mik isumaqatigiissutaa naapertorlugu qilalukkap mattaa kilomut 85 koruunilertussaagaa, taassumali qaavatigut kilomut 35 koruuninik ilaneqartarmat, Savissivimmiup qilalukkap mattaa kilomut 120 koruuninnassutigisaraa. Taamaammat aamma taamannak isornartorsiuineq tunngavissaqanngilaq, Charles Kastberg oqarpoq.
Arctic Green Food 2007-imi namminersortunit suliffiutigineqalerpoq. Arctic Green Foodimut tapiissutaasartut piniartunut aalisartunullu pitsaanerusumik agguataarneqarsinnaanerat, kisitsisit 2007-mut atuuttut tunngavigalugit inatsisartuni ilaasortamit Agathe Fontainimit isornartorsiorneqarpoq.
