Agathe Fontain:Kommuneqarfiit akisussaasuusariaqarput
Kommuneqarfiit arlallit meeqqanik sumiginnakkanik sullissinerminnut atatillugu ikioqqupput. Taamaakkaluartorli tassa kommuneqarfiit pisussaatitaapput namminneerlutik iliuuseqarnissamut aningaasaliinissamullu.
Inatsisartut Ilaqutariinnermut Ataatsimiititaliaata siulittaasua Inuit Ataqatigiinneersoq Agatha Fontain oqarpoq kommuneqarfiit ajornartorsiutinut akisussaangaluarlutik Namminersornerullutik Oqartussanut ingerlatitseqqiiginnartartut.
-Kommuneqarfinni tulleriiarisarnerit matumani pineqarput. Tunngaviusumik pissutsit iluarsineqarsimatinnagit timmisartoqarfinnik aqqusinernillu sanaartornerit aallartinneqarneq ajorput, Agathe Fontain oqarpoq.
Kommuneqarfiit pisussaaffii ilaqutariit pisussaaffiinut assersuuttariaqartut Agathe Fontain oqarpoq.
-Meeqqat nerisassaqaratillu atisassaqanngippata umiatsiarsinissat biilisinissallu salliutinneqarneq ajorput.
Kommuneqarfiit taamaasillutik politikkikkut siunnerfeqarnissamik amigaateqarsimasut Agathe Fontain isumaqarpoq suliffeqarfiillu akimorlugit suleqatigiittoqarnerulernissaa kaammattuutigalugu.
