Agathe Fontain ugguanngilaq

Qaammatit tallimaannaat nalakkersuisooreerluni Agathe Fontain peqqinnissaqarfimmi naalakkersuisuunerminit ullumi tunuassaaq, IA-lu sinnerlugu inatsisartutut ilaasortatut suliani nangeqqissavai.

- Politikimik suliaqartuutilluni naluneqarneq ajorpoq, atorfik qaqugorsuarmut atorfigineqarsinnaanngitsoq. Pisut sukkasoorujussuarmik ingerlapallattarput, aqaguanilu politikimi uppisitaasoqarsinnaasarpoq. Politiki taamaappoq, Agathe Fontain, Radioaviisimut taama oqarpoq;

Agathe Fontain-ip peqqissumissutiginngilaa, sivikikkaluamik naalakkersuisunut ilaasortaasimanini.

- Qaammatit tallimat taakkua pisunik uannut paasisaqarfiusimaqaat ilikkagaqarfiusimallutillu. Assersuutigalugu paasisaqarfiginerulersimavara, peqqinnissamut allannguut nutaaq qanoq pingaaruteqartiginersoq.

Agathe Fontain inatsisartunut ilaasortanngoqqippat, sinniisussap aappaa; Aqqaluaq Egede inatsisartuni suliunnaarallassaaq, sinniisussarlu siulleq; Olga P. Berthelsen, Kuupik Kleist-ip uteqqinnissaata tungaanut inatsisartuni suliinnarallassaaq.