Agathe Fontain: Sulisunik amigaateqarneq takornartaanngilaq

Allattoq Mads Lynge
decembarip 14-at 2006 17:03

- Eqqarsartaatsikkut napparsimasunik katsorsaaneq ajornartorsiorpoq. Eqqarsartaatsikkut napparsimasunik nunatsinni katsorsaanermi sulisunik pisortanillu amigaateqarneq takornartaanngilaq.

Taama oqarpoq Peqqissutsimut naalakkersuisoq, Agathe Fontain, Dronning Ingridip Napparsimavissuani immikkoortortami A 1-imi ajornartorsiorneq pillugu Radioaviisi oqaluttuareersorlu.

Tassani isumaginninnermi siunnersortit pisortaat Astrid Hansen Hard oqarpoq eqqarsartaatsimikkut napparsimasut naammaginartumik katsorsarneqanngitsut, immikkoortortami ajornartorsiuteqarnera patsisigalugu!

A 1-imi sulisut tusagassiuutinut nalunaaruteqarlutik erseqqissarpaat, isornartorsiuinerit sulisut tamakkerlutik isummiussarinngimmatigik. Sulisut qanittukkut ataatsimiinnerminni nakorsaaneq qullersaasoq taperserlugu oqaaseqarsimapput. Nakorsaaneq taanna tallimanngormat soraarsinneqarpoq, immikkoortortami sivisuumik aaqqiagiinnginnermut atatillugu.

Peqqissutsimut naalakkersuisup pisortaqarfini qinnuigisimavaa napparsimavissuaq suleqatigalugu aaqqiissutissanik siunnersuusioqqullugu.