Agathe Fontain: Naalakkersuisut avatangiisit pillugit politikkiat ersarluppoq

CO2-mik Kalaallit Nunaanni aniatitsinerup annikillisarneqarnissaa, avatangiisinut naalakkersuisup Kim Kielsenip anguniagaraa, nukissiuutinilli ataavartunik misileraaffiup, Nutaaliorfiup Sisimiuniittup, aningaasaliissutinik ikilisaavigineqarnissaa, Inuussutissarsiornermut suliffeqarnermullu naalakkersuisup Siverth K. Heilmannip nalunaarutigaa. Agathe Fontainip tamanna apeqquserpaa:

- Naapertuutinngilaq. Nammineq isummiussanik pilersaarutinillu ersarissunik peqanngikkaanni, taava allat tunniussisinnaasut isiginiarlugillu tusaaniarneqartariaqartut isumaqarpunga, Agathe Fontain oqarpoq.

Nutaaliorfiup januaarip aallaqqaataaniit atuutilersumik 1 millioni koruuninik sipaarniarfigineqarnissaa, Inuussutissarsiornermut naalakkersuisup Siverth K. Heilmannip decembarimi nalunaarutigaa.

Tamanna Nutaaliorfiup suliaanik ilisimannippallaannginnertut Agathe Fontainip nalilerpaa:

- Nutaaliorfik sulerisimanersoq ilisimarpianngikkaa isumaqarpunga. Nutaaliorfimmiit nammineq saqqummiunneqarpoq assighiinnitsunik sunik suliaqartoqarnerluni. Suliat pingaaruteqartut, CO2-millu siunissami minnerusumik aniatitsinissatsinnut iliuusissanik piukkunnartorujussuarnik suliaqarput, Agathe Fontain oqarpoq.

Nunap kissaanik atuilluni kiassaatit, erngup nukinganik nukissiorfeeqqat, seqinisaatit, anorisaatit, nukissiuutillu ataavartut allat, tassa Nutaaliorfimmi suliniutigineqartut ilaat, aningaasaliissutillu peerneqarpata unitsiinnarneqartariaqalersinnaasut, Agathe Fontain oqarpoq.

- Aningaasaliisoqaqqinnianngippat, ernumagineqarsinnaavoq Nutaaliorfik ingerlaqqiassinnaanani uniinnartariaqartoq, uffalu suliai pingaaruteqartorujussuit pissanganartorujussuillu tassani ingerlanneqartut. Naalakkersuisut Nutaaliorfimmut isiginneriaasertik allanngortittariaqaraat, aningaasaliissutillu ingerlatiinnarlugit, aningaasat taakkua utissaqqaarmata, Inuit Ataqatigiit sinnerlugit inatsisartunut ilaasortaq Agathe Fontain oqarpoq.

Avatangiisinut naalakkersuisoq Kim Kielsen, Inuussutissarsiornermullu naalakersuisoq Siverth K. Heilmann oqaaseqartinniaraluaratsigit iluatsinngilarput.