Agathe Fontain: Inuusuttut tusaaniarneqarusariaqarput

Inuusuttut inuunerminni qanoq atugaqarnersut inuiaqatigiinnit taamaammat tusaaniarneqarnerusariaqarput. Taamaaliortoqanngippammi imminortarnerit ikiliartornavianngillat.

Peqqissutsimut naalakkersuisup Agathe Fontainip isumasioqatigiinneq ammaanersiorlugu oqalugiaataani pingaarnertut tamanna oqariartuutigineqarpoq.

Sermitsiap nittartagaani taama allaaserinnittoqarpoq.

Imminortarneq pinaveersaartinniarlugu qanoq iliuuseqartoqarsinnaanissaa pillugu inuusuttut qanoq oqariartuuteqarnersut, Agathe Fontainip naalakkersuisoqataatalu Maliina Abelsenip maanna annertunerusumik paasisimasaqarfigilersinnaassavaat.

Issittumi Inuusuttut Suliniaqatigiiffiat ICYC inuusuttunik aamma ataatsimeersuartitsivoq, taakkualu aamma innersuussuteqartussaapput.

Isumasioqatigiinneq PAARISA-mit, ICYC-mit nunanullu allanut naalakkersuisoqarfimmit aaqqissorneqarpoq.

Aaqqissueqataasup Jette Eistrupip Paarisameersup erseqqissarpaa inuunerup ersarissarnissaa oqariartuutigineqarmat:

- Inuunerup isiginiarneqarnissaa erseqqissarparput, imminortarneq pinnagu. Canadamiusut ”inuuneq eqikkusupparput” inuunermimi ajunngitsut ersarissartariaqarput. Oqariartuut neriunneq nukissaqarnerlu inuiaqatigiinnut siammartikkusupparput, taamaasilluni inuuneq inoorusunnarsisikkusullugu, Jette Eistrup oqarpoq.