Agathe Fontain: Finn Karlsen naak-una?

Piniarnermut Aalisarnermullu Naalakkersuisoq, Finn Karlsen, Arfanniarneq pillugu Ataatsimiititaliarsuup Anchorage-imi ataatsimiinnerani sooruna peqataanngitsoq, uffalu Kalaalit Nunaanni arfattassat pillugit apeqqutit pingaaruteqaqisut oqaluuserineqartussanut ilaasut?

Agathe Fontain, Inuit Ataqatigiinneersoq ullumi taama aperivoq. Agathe Fontain Naalakkersuisooqatigiit “Arsarnerit” ajalusoornissaasa tungaannut Inatsisartut Aalisarnermut Piniarnermullu ataatsimiititaliaani siulittaasuugaluarpoq.

- Qipoqqarnik pisassinneqarnissaq Arfanniarneq pillugu Ataatsimiititaliarsuup ataatsimiinnerani Kalaallit Nunaata ilungersuutiginiarmagu, Piniarnermut Aalisarnermullu Naalakkersuisup peqataanissaa assorsuaq pingaaruteqaraluarpoq, nunat kalaallit arfanniartarnerannut akerliusut peqataanermigut killinniarsarissagaluaramigit.

Agathe Fontainillu maluginiarpaa, Kalaallit Nunaanni Aalisartut Piniartullu Kattuffiani ilaasortaq, Leif Fontaine, kiisalu Pisortaqarfimmi atorfillit Naalakkersuisut peqataatimmatigik, taakkulu tassa kisimik kalaallit arfattassinneqarnissaannut ilungersorput.

Pisuni taamaattuni, piniartut aalisartullu aningaasarsiornikkut atugaasa pitsanngorsarnissamik siunertalimmik suliniarnermi, pingaaruteqarluinnaraluarpoq, Naalakkersuisunut ilaasortap ataatsimiinnerni nammineq peqataanissaa, Agathe Fontain tusagassiutinut allappoq.