AG: Uumasunik illersuisut aqunniassanngilaatigut
Piniarnermut Aalisarnermullu Naalakkersuisoq Finn Karlsen Atuagagdliutini saqqummersuni apersorneqarluni oqarpoq Canadamiut puisittaasa amiinik nunatsinnut eqqussisinnaaneq pillugu nunatsinni qinikkat akerleriissuteqarnerat, nunani allani uumasunut illersuiniaqatigiiffiit puisit amiinik tunisassiornermut akerlilersuinerannut sakkortusigaluttuinnartitsisoq.
Taamaattorli puisit amiinik Canadameersunik eqqussuisoqalissappat tamanna takornariaqarnermut akornusiinavianngitsoq Karslen aamma isumaqarpoq.
- Puisit amiinik eqqussuinerup takornariartitsinermik inuussutissarsiorneq akornussissappagu piniarnermik inuussutissarsiuteqarnerup qanoq pingaaruteqartiginera sakkortuumik suli paasisitsiniutigissavarput. Ilanngullugu eqqaamasariaqarparput Canadami puisinik toqoraasarneq inuppalaarnerusoq uppernarsarneqareersoq taama aalajangiisoqarmat, Finn Karlsen AG-mut taama oqarpoq.
Finn Karlsen erseqqissaavoq Nunatta Ammerivianut atatillugu aalajangerneq suliffinnik annaasaqannginnissamik tunngaveqartoq.
Ammerivik imminut akilersinnaasumik ingerlanneqassappat puisit amii 100.000-it 150.000-illu akornanniittut ukiumut suliartineqartassasut Finn Karlsen AG-mut oqarpoq.
