AG: RG Pisiffittut namminersortunngorsarneqassaaq
Pisiffiup namminersortunngorsarnera soorluli Royal Greenlandimut tuniluunnialersoq. AGmi ullumi saqqummersumi allaaserisami atuarneqarsinnaavoq.
Royal Greenlandip aqutsisuisa aningaasaliisartullu piginneqatigiit Alfred Bergikkut namminersortunngorsaanissaq pillugu isumaqatigiissuteqarsimanerisa akunnerminni allakkiaat AGp pissarsiarisimavaa. Allakkiami atuarneqarsinnaavoq siulittaasuusimasup Elias Larsenip tulliatalu Ole Kielmannip Alfred Bergikkut isumaqatigiissuteqarfigisimagaat 2002mi Pisiffiup namminersortunngorsarneqarneratorluinnaq ilusilerlugu.
Taamani Keld Askær Pisiffimmi pisortaaneruvoq, namminersortunngorsarneqarmallu siuttut allat peqatigalugit, iluanaarutigisaminnik piginneqataassutit 17 %ii pisiarisimallugit. Periaatsillu taassuma asserluinnaanik Royal Greenlandimi aqutsisut iliornialersaarput. Atsioqatigiissimanerup kingorna sapaatit akunneri marluk qaangiuttut siulersuisut ataatsimiinnerminni ilisimatinneqarsimanngillat.
Aggustip 19iani ataatsimiinnermi siulersuisut isumaqatigiissutip atsiorneqarsimaneranik aatsaat ilisimatinneqarsimapput, isumaqatigiissuteqarneq sapaatit akunneri arfinillit qaangiuttut. AGmi allaaserineqartoq tunngavigalugu februaarimi siulersuisunut ilaasortanngorlaat, sulisut sinniisaasa sulinermut akornusersuisutut taasat, Royal Greenlandimi aqutsisut Alfred Berg peqatigalugu isumaqatigiissusiaat piginnittunit, tassalu naalakkersuisunit pisinnaatitaaffilerneqarsimanertik malillugu isumaqatigiissuteqarsimanersut qularutigisimavaat.
