AFS Nunatsinni peqatigiiffiliorpoq
AFS Grønlandip peqatigiiffimmik pilersitsilluni ataatsimeersuarnini aamma aallartippaa, taamaalilluni Kalaallit Nunaat peqatigiiffinnik marlunnik pisuunnguallappoq, nuna tamakkerlugu Peqatigiiffik, Nuummilu immikkoortortaq.
- Kalaallit Nunaat anginerusumik akisussaaffimmik maanna tuniniarparput, taamaasillutalu nunani allaniittut amerlanerit angerlartikkusuppavut, maani suliniassammata. Taama oqarpoq Erik Nielsen, Danmarkimi AFS Interkulturimi siunnersorti.
Peqatigiiffiit marluk unnugu pilersinneqartussat tassaassapput Nunatsinni siullerpaamik atuutilertussat. Inuit ataasiakkaat nammineq piumassusertik malillugu, AFS-imik Danmarkimi allatseqarfimmik tapersersorteqarlutik, siusinnerusukkut ingerlatsisarsimapput. Erik Nielsenillu oqarneratuut ajunngitsumik ingerlasimapput. Kisianni tamatuma nassatarisimavaa inuusuttut kalaallit paarlaasseqataasussat allamukartigatik piareersarsinnaasimannginnerat, tamannali maanna tassa periarfissaalissaaq.
Uani pineqartoq tassaavoq paarlaasseqataasussap nunamut allamut ingerlasussap nunami allamiinnissaata piareersarluarsimanissaa, piareersarnerlu piffissaagallartillugu aallartinneqartariaqarpoq, nunatsinnilu ingerlanneqaruni pitsaanerpaajussalluni.
Pitsaassuserlu ima qaffanneqassaaq:
Selection Camp-imik taasatsinnik pilersitsiniarpugut. Paarlaateqatigiittussallu Selection Camp-imut aggersarniarpavut, tassanilu piareersassapput paasiniarlugu nunat sorliit angallaviginiarnerlugit, qanoq oqaatsisigut piginnaneqarnersut il.il..
Selection Camp aamma katersiffiusassaaq paarlaasseqatigeereerlutik angerlamut apuuttunut, tassanilu eqqartortassavarput qanoq ajornakusoortiginersoq nammineq kulturerisamut uteqqinnermi.
Aamma AFS-ip paarlaasseqatigiinnermi utertut akornanni attaveqarnerulernissaq pilersikkusuppaa:
Uagut kalaallit paarlaasseqatigiinnermi peqataasimasut akornanni suli uummaarinnermik sulisoqartarnissaa pilersikkusupparput, paarlaasseqataasullu taamalillutik peqatigiiffilerinermi peqataalerlutik, nunanullu allanut attaveqarnerni, peqataanerulerlutik.
Taama oqarpoq Danmarkimi AFS interkulturimi siunnersorti Erik Nielsen.
