AFS-ertut: Coronavirusi pisuulluni angerlartariaqalerneq uggornarpoq
AFS-ertut nunatsinnut angerlarniarnerat oqitsuinnaasimanngilaq, nunarpassuimmi killeqarfitik matoqqavaat.
16-inik ukiulik Naasu Lund Egede Mexicop ilaani Hondurasimi AFS aqqutigalugu qaammatini aqqanillit atuartussaagaluarpoq.
Nualluulli coronavirus nunarsuatsinni siaruaatileriasaarpoq, Hondurasimiinnissaalu qaammatinik sisamanik sivikillisariaqalerluni.
Naasu Lund Egede Hondurasimi ukiisussaagaluarpoq.
- Uggornarsuaarpoq soorunami. Kulturi nutaaq oqaatsillu nutaat ilikkarnikuullugit misigisassat allat nutaat annaagatsigit, Naasu Lund Egede oqarpoq.
Taassuma angerlartariaqalernini akueraa, aallarniarnerli unammillernarsimavoq.
Kalaaliaqqat tallimat AFS-ertut tallimat suli Danmarkimut aqqutissarsinngillat.
Pingasut Argentinamiipput, taakkulu sapaatit akunnerata tulliata naanerani Danmarkimut apuunnissaat AFS-imit sulissutigineqarpoq.
Marluk USA-miipput, taakkulu Danmarkimut marlunngorpat apuunnissaat naatsorsuutigineqarpoq.
Tusarfik: AFS DanmarkNualluummi tuniluuttoq pissutaalluni nunarpassuit killeqarfitsik matunikuuaat.
- Angerlarnissatsinnut aqqutissat ajornarsinikuugamik taamaammat AFS-ip paasiniarsarivaa sukkanerpaamik qanoq angerlartissanerluta.
Naasu Lund Egede amerika aqqusaarlugu tallimanngornerup ullaassaani Danmarkimut apuuppoq. Danmarkimiinnerminilu ilaquttamini najugaqarallassalluni.
Hondurasimiit Danmarkimut allarniarnerata iluatsinniarnera ulluni aqqaneq-marlunni pivoq. Taanna Danmarkimiissaaq nunatsinnut aallarsinnaanngornissami tungaanut.
- Assut piffissaq nikinganera qasunarpoq. Kisianni ajunngitsorujussuuvunga maani ilaquttanni, Danmarkimut apuuteqqammerluni Naasu Lund Egede taama allappoq.
Nunanit allanit Danmarkimut tikittut ulluni 14-ini angerlarsimaannarnissaat Danmarkimi pisortat peqqussutaavoq.
Inuulluaqqusisariaqalerneq alianartoq
Ikuala Lyberth assingusumik aamma aqqusaagaqarpoq. Taanna Costa Ricami atuariartoqqavoq, piffissamilu tassani misigisani assut nuannarai Costa Ricalu "paradis"-imut assersuullugu.
Taamaammat pilersaarutaareeraluartumit siusinnerusukkut angerlartussanngorneq tassunga assut annernarpoq.
- Kisianni tassa atuartut amerlasoorpassuit ilinniarnerat taama inerneqarpoq. Soorunami tamatta aliasuutigeqaarput aamma takorloorneqarsimanngilaq taamatut inerneqassasoq.
- Assut aliasuutigeqaara aamma ajoraluaqaaq coronavirusip atuarnera inernileraa, Ikuala Lyberth oqarpoq.
Taanna AFS-eqatinilu allat San Josemiit Frankfurtimut timmisartoqataanissartik iluatsippaat. Timmisartoq tyskit oqartussaasa atuartut angerlarnissaat siunertaralugu attartorpaat. Ikuala Lyberth qallunaajaqqallu qulingiluat Frankfurtimiit Danmarkimut akunnerit aqqaneq-marluk ingerlaareerlutik busserlutik apuupput.
