Afrikap kangiani inuit 10 millionit kaapput

Afrikap kangiani ukiuni qulikkuutaani aatsaat taama ajortigisumik panernersuaqarpoq, inuillu 10 millioningajaat nerisassaqanngillat.
Allattoq Carla Davidsen
aggustip 03-at 2011 05:38

Kalaallit Røde Korsiata Nuummi immikkoortortaa nammineq piumassutsiminik Røde Korsip Afrikap kangisissortaani ikiuiniarnermut 100.000 koruuninik sapaatip-akunnerisa marlungajaat matuma siorna nassitsivoq, Kalaallillu Røde Korsiata nuna tamakkerlugu Peqatigiiffia nuna tamakkerlugu maanna katersuiniartitsissalluni aalajangerpoq, ullumikkumiit septembarip 16-iannut tamanna pissalluni.

Nuna tamakkerlugu katersuiniarneq KNR suleqatigalugu pissaaq, katersuiniarnerummi nalaani katersuiniarneq pillugu KNR-ikkut KNR-TV-kkullu ussassaaruteqartassammat.

- Katersuiniarneq naammassingajalerpat matumiit matumut katersuiniartitsissalluta aamma naatsorsuutigaarput, Kalaallit Røde Korsianni siulittaasoq, Tove Blidorf, oqarpoq.

Taassuma aamma neriuutigaa sinerissami nammineq piumassutsiminnik katersuiniartoqarumaartoq, soorlu Haitimi nuna siorna sajorujussuarmat taama pisoqartoq. - Kaattut tv-kkut takullugit qamuuna attortinnaqaaq, toqusorpassuillu, pingaartumik meeqqat.

Neriuutigaarput nuna tamakkerlugu katersuiniartitsilerutta kalaallit pisarnermissut tapersersuilluarumaartut, Tove Blidorf KNR-imut oqarpoq.

Nuna tamakkerlugu katersuiniarnermut tapersersuerusukkaanni kontomut 6471-8008008-mut aningaasanik ikisisoqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq