Afrikami nunat ilaanni innuttaasut qimarrapput

Elfenbenkystenimi naalakkersuinikkut akerleriissuteqarneq pissutigalugu, aattalimmillu eqqissiviilliornissamik aarlerisaarisoqarluni, innuttaasut amerlasuut qimarrapput.
januaarip 11-at 2011 14:56

Naalagaaffiit Peqatigiit qimaasut pillugit qullersaqarfiannit nalunaarutigineqartut malillugit, qimaasut 25.000-it nunami sanilerisami Liberiamiipput.

Akerleriitttoqarnera isumannaallisaanikkullu qularnartorsiorneq pissutigalugit inuit ullormut 600-t takkuttarput.

Præsidentimut novembarip qaammataani qinersisoqarmat ajorsartoq, Laurent Gbagbo, præsidentiunerminit tunuarnianngilaq, qinersinermili ajugaasoq, Alassanne Ouattara, nunarsuarmiunit ajugaasutut akuerineqartutut naatsorsuussaalluni.

Præsidentimut qinersinerup kingorna eqqissiviilliortoqarmat, inuit 200-t sinneqartut toqutaasimanissaat Naalagaaffiit Peqatigiit eqqoriarpaat.

Præsidentimut qinersinermi ajorsartup, Gbagbop, isummannaallissaanermut sakkutuui unioqqutitsillutik toqutsisarsimasutut pasineqarput, illuatungiliuttunullu pissaanermik atornerluilluni saassussisarsimasutut pasineqarlutik.

Nunat tamat suliniaqatigiiffiinit Laurent Gbagbo annertuumik akerlilerneqarpoq, nunamit aallaqqusaajunnaartinneqarluni, pigisaalu nalillit USA-miittut Tuluit Nunaanniittullu atorneqarsinnaajunnaartinneqarput.

Laurent Gbagbo nammineerluni tunuanngippat Suleqatigiinneq pillugu suliniaqatigiiffimmi, Ecowasimi, ilaasortat, pissaaneq atorlugu uppitinniarlugu aamma sioorasaarutigereerpaat.