Afrikami nunami qupparsuaq danskit issittup imartaani piumasaqaataanut iluaqutaasinnaavoq
Afrikap avannaata kangiatungaani qupparsuaq 60 kilometerinik takitigisoq otte meterinillu silissuseqartoq ujaqqat pinngoriartortarneranut paasissutissanik nutaanik aallerfiusinnaavoq, Danmarkillu Qalasersuup tungaanut killeqarfilerngusaannermi piumasaqaataanut iluaqutaasinnaalluni.
Tamaanimi saalimanersat - tassa nunarsuup qalipai nunarujussuit - marluk amerlanerusulluunniit avissaariartorput, taamaalillutillu nunarujussuit tasikkiartuusillutik saalimanersannguuttarlutik, naggataagullu quppanitsitertarlutik. Quppanittitereeraangatalu ujarak aannikoq - tassa anngaq - anialertarpoq, nunamillu nutaamik pinngortitsisarluni.
Qupparsuaq pineqartoq immap qaavaniit 100 meterinik itinerusumiippoq. Ilimanarporlu Nunatta avannaata ilaa qangarsuaq taamatorluinnaq kivisimassasoq. Kivinikorlumi massakkut imaaliallaannaq takuneqarsinnaanngikkaluarluni suli nassaassaavoq, immaqalu Kalaallit Nunatta nunatarsuanut akuussagunarluni.
- Taanna nassuiaat uppernarsaatissaqartuugutsigu danskit naalagaaffeqatigiiffiata killeqarfia avannamut illuarataannaavoq, taamaalillutalu Kalaallit Nunaata ilaa kivinikup, Qalasersuullu tungaanut qanillatuussaassinnaassalluta. Tamaanimi gasseqarfissuit uuliaqarfissuillu pissarsiarisinnaanngussagaluarpavut, Københavnip Universitetiani Ujarassiuutut ilinniarfittaani lektoriusoq Paul Martin Holm oqaluttuarpoq.
Killeqarfilerngusaanneq FN-imi nunat killinginik nalilersuisartut ilisimatuut 21-usut aalajangiiffisussaavaat. Danmarki ilisimatusaatigalugu misissuinissartik 2014-ip tungaanut ingerlatissavaat, Ruslandilu Qalasersuarmik piginnittoorusunnerminik suaarutiginninnera 2011-imi uppernarsaatissarsiniartariaqassallugu.
