Afrikami meerarpassuit ikiorneqanngikkunik toqorarsinnaapput

Afrikap kangimut nuungajuttarsuani meerarpassuit qaammatini tullerni pilertortumik ikiorserneqanngikkunik toqorartussanngortut, Danmarkimi UNICEF-ip immikkoortortaqarfia nalunaarpoq, aningaasanillu katersuiniaasitsilerlunilu.

-Qaammatit tulliuttut pingasut tallimallu akornini atugassarititaasut ajorluinnalissapput. Siallertarnera nalliukkaluartoq takkutiaanngikkutta meerarpassuit kaannermik nappaatinillu toqorassapput, ikiuiniaqatigiit siuttuata Christian Balslev-Olsenip nalunaarutigaa.

Naak 469 millioni koruuninik ikiuinernut atugassaminnik qinnuteqaraluarlutik, aningaasat pingajorarterutaannaat pissarsiarisimavaat.

Nunat kaannermik nappaatinillu eqqorneqartut tassaapput Kenya, Etiopien, Djibouti, Eritrea, ajornerpaanillu nalaanneqartoq Somalia. Tassani inuit tallimaagaangata ataaseq inuussagunik nerisassanik pisariaqartitaminnik ullormut pineq ajorput, piaarnerpaamillu ikiorneqartariaqarlutik.

Afrikap kangimut nuungajunnerani meeqqat 300.000-illit kaapput, taakkunanngalu 40.000-t nerisinneqanngikkunik qaammatini qaninnerni perlerlutik toqorassapput. Naalagaaffiit Peqatigiit naatsorsorpaat panernersuaqarnerani inuit 16 millionit eqqugaasut, affaalu piaanerpaamik ikiortariaqartut.