Afrikami Congomi meeqqat atugaat pillugit Human Rights Watch nalunaarusiorpoq

apriilip 06-at 2006 18:05

Afrikami naalagaaffeeqqami, Congomi, meeqqat atugaat pillugit inuit pisinnaatitaaffii pillugit suliniaqatigiiffik, Human Rights Watch, nalunaarusioqqammerpoq.

Congomi meeqqat amerliartuinnartut ilisiitsuunerarlugit angajoqqaaminnit naalliutsinneqartalersimasut anisinneqartalersimasullu nalunaarusiami saqqummiunneqarpoq.

Congomi illoqarfiit pingaarnersaanni meeqqat angerlarsimaffeqanngitsut 70 procentii ilisiitsuunerarlugit angajoqqaaminnit anisitaasimapput. Meeqqat HIV-mik tunillanneqarsimasorpassuit angajoqqaavisa aamma anisittarsimavaat.

Meeqqat taakku atuarfimmiit aamma anisitaasimapput, meeraqatiminnullu allanut qanilleqqusaajunnaarsimallutik.

Meeqqat pineqartut oqartussanit aamma tigusarineqartarsimapput, unatarneqartarlutillu naalliutsinneqartarsimallutik. Inatsit nunasiaateqarnerup nalaaneersoq, meeqqat aqqusinerni qinnuulooqqusaannginnerannik imaqartoq, oqartussanit utoqqatsissutitut atorneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk