Afghanistanimiut litiumiuteqaqaat

Afghanistanip qaqqaani nunataanilu aatsitassaq litium 1 billion dollarsinik nalilik, ilisimatuunit nassaarineqarpoq.
juunip 14-at 2010 10:00

Amerikamiut Afghanistanimi kuultimik, kanngussammik litiumimillu annertuumik nassaarput. Aatsitassaq nassaarineqartoq qallunaat aningaasanngorlugit 6.100.000.000.000-inik naleqarpoq. New York Times, allagaatinik isertortumik naqissusikkanik pissarsisimasoq naapertorlugu Jylland-Posten taama allappoq.

Taakkunani ilaatigut takuneqarsinnaavoq Afghanistan siunissami litiumimik tunisassiornermut, soorlu ullumikkut Saudi-Arabiap uuliamik tunisassiorneratulli pingaaruteqartigilersinnaasoq.

Litium ilaatigut nunarsuaq tamakkerlugu telefoninut angallattakkanut qarasaasianullu angallattakkanut atorneqartarpoq.

Afghanistanimi aatsitassarsiornerup annertusarnissaa ukiunik arlalialunnik sivisussuseqarunarpoq, USA-llu aningaasarpassuit milliardillit peqquserluttuliornermik suli annertunerulersitsiinnarnissaat annilaanngatigaa.