Afghanistanimiut danskinit ilinniartinneqalerput
Afghanistanimiut sakkutuui maanna sillimaniarnermik isumaginnissinnaalernissaasa tungaannut qallunaat ilinniartittussanngorpaat. Afghanistanimi suliniuteqarneq pillugu partiit isumaqatigiissuteqarnikuusut ullumi ataatsimiinneranni tamanna isumaqatigiissutigineqarpoq.
Tamatuma peqatigisaanik, sillimaniarnermik afghanistanimiut tigusinissaannut piffissamik aalajangiussinissaq pillugu piumasaqaatitik Socialdemokratit aamma De Radikalit sakkukillisippaat, DR taama nutaarsiassaqartitsivoq.
Qallunaat sakkutuuisa nunap immikkoortortaani Helmandimiittut qaammatit arlaqanngitsut qaaqqiuppata sakkutooqatigiit afghanistanimiut sungiusagassatik ilagilissavaat. Helmandi pillugu ukiormanna suliniarnissaq pillugu missingiusiaq danskit naalakkersuisuisa ullumi saqqummiussaat taama imaqarpoq, tassani ilaatigut allassimavoq qaammammi oktobarimi afghanistanimiut sakkutuut politiillu 300.000-inik amerlanerusut ilinniartinneqareersimassasut, taama ilinniartinneqareersut maanna 200.000-iupput.
Inuk sanileralugu ilinniartitsinissamut pilersaarummik sukumiisumik peqartoqarpoq, tamatumani suliassat mikinerusut afghanistanimiunit isumagineqartarput, piffissallu ingerlanerani akissussaassuseqarneq pikkorissuseqarnerlu pigineqalerpata, suliassat anginerusut namminneerlutik tigujumaaraat pilersaarutaavoq, taama oqarpoq nunanut allanut ministeri Lene Espersen.
Afghanistanimiut sillimaniarnermik qaqugu tigusinissaat Helmandi pillugu suliami isumaqatigiinngitsutaavoq. Taama pisoqarnissaata aalajangersimasumik ullulerneqarnissaa Socialdemokratit aamma De Radikalit ukiarmi piumasaqaatigaat. Tamannali Lene Espersenip maanna akueriumanngilaa.
Tamatumani afghanistanimiut qaqugu Afghanistanimi akisussaassusermik tigusinissaat uagutsinnit ilisimaneqarnissaa pisariaqarpoq.
Ullumi isumaqatiginninniareernerup kingorna Socialdemokratit nunanut allanut tunngasunut oqaaseqartartuata Jeppe Kofoedip aamma De Radikalit siulittaasuata Margrethe Vestagerip nalunaarutigaat, aalajangersimasumik ulluliinissamik piumasaqaat taanna aalajangiusimaneqarluinnartuunngitsoq.
2010-mut pilersaarut taamaallaat pineqartoq eqqartoripput ukiullu ingerlanerani nutarterneqartussaasoq oqarsinnaavugut. Taamaakkaluartoq siunissamut sivisunerusumut pilersaarusiortoqarnissaa piumavarput, naalakkersuisullu tamanna aamma piumaneraat maanna takussavarput.
Ullormik aalajangersimasumik taasaqartoqarnera tusarsinnaagukku, taava alloriangaatsiarsimassaagut, taamaakkaluartoq ullormik aalajangersimasumik ilimasaarisoqarsinnaappat aamma alloriartoqarsimassaaq.
