Afghanistanimit anisitaapput
Europamiut marluk EU-mi FN-imilu Afghanistanimi atorfillit Afghanistanimit anisitaasussanngorput kingusinnerpaamillu ullumi sisamanngornermi qimassallugu.
Allattoq Mads Lynge
decembarip 27-at 2007 11:45
Afghanistanip taakku inuit marluk pasivaat naalagaaffiup sillimanissamut inissisimanera ajoqusersuisutut, taamaaliortarsimappullu Talibaninik ataatsimeeeqateqartarnermikkut. Pineqartut tassaapput EU-p Afghanistanimi aallartitaa Michael Simple FN-imilu qaffasissumik atorfilik Marvin Patterson.
Afghanistanimi naalakkersuisut atorfilittaasa arlaat aterminik isertuusseqqusisoq nutaarsiassaqartitsivimmut Reutersimut ilisimatitsivoq taakku Helmandimi, tassa Afghanistanimi nunap ilaani, talibaninik naapeqateqartarsimasut aningaasanillu tunisisarsimasut.
Afghanistanimiut 50 tigusaasunut suleqataasut aamma tigusarineqarsimapput.
