Afghanistanimiinneq naatsorsuutigisamit ajornakusoorneruvoq

Afghanistanimut nunat tapersersuerusuttut Kabulimi ataatsimeersuarnerat ammarneqartorlu, Afghanistanimi nunat tamalaat sakkutuuisa suliassaat naatsorsuutigisamit ajornakusoornerujussuusimasoq, NATO-p pisortaata, Anders Fogh Rasmussenip, nassuerutigaa.
Allattoq Elisa Isaksen
juulip 19-at 2010 10:27

- Nunat tamalaat ukiuni qulingiluani ilungersuuteqareersullu annernaraluartumik paasivarput, naatsorsuutigisatsinnit akisunaarerujussuarsimalluta - ingammik sakkutuut nunanit tamalaaneersut Afghanistanimiullu toqutaasut eqqarsaatigalugit, Danmarkimi ministeriunerusimasoq Tysklandimi aviisimut Hamburger Abendblattimut oqarpoq.

- Suliassap qanoq angitigissusia nunanit tamalaanit minnerusussatut takorloorneqaraluarmat miserratigineqarsinnaanngilaq, Fogh oqarpoq, sakkutuuliinerlu 2001-imi Talibanit naalakkersuiunnaarnerannit aallartittoq innersuussutigalugu.

- Ajoraluartumilli annaasaqarnerunissarput ilimagisariaqarparput. Kisianni NATO-p sakkutooqartitsinera politikkikkut pingaaruteqaqaaq. Taakkumi pissutaallutik Taliban politikkikkut sakkutooqarnikkullu nukittunerunngilaq, Anders Fogh Rasmussen tyskit aviisianni taama allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq