Afghanistanimi tigusat naalliutsinneqartarput

januaarip 05-at 2007 10:04

Amerikamiut qulit, sorsunnermi tigusanik apersuisartut nalunaarput, Afghanistanimi tigusanik aaqqissuussamik naalliutsitsisoqartartoq maannalu Danmarkimi naalakkersuisut illuatungiliuttunit isornartorsiorneqarput.

DR-ip piviusulersaarutaata “Den Hemmelige Krig”-ip decembarimi takutinneqarnerata kingorna nalunaarusiaq naammaginartumik nassuiaanerunngitsoq Socialdemokratit, Det radikale Venstret, SF-it aamma Enhedslisten isumaqarput.

Afghanistanimi susoqarsimanersoq Danmarkimi naalakkersuisut paasiniarsimanngikkaat Socialdemokratit nunanut allanut oqaaseqartartuat

Mogens Lykketoft oqarpoq:

- Naalakkersuisut misissuinissaminnut pissutissaqarluarsimagaluaqaat. Tassami aviisini allaaserineqarpoq naapertuilluanngitsuliortoqartartoq, Buship Rumsfieldillu oqaatigaat isumaqatigiissutit malinneqarnianngitsut aamma danskip oqaluttaasup sakkutuut qullersaannut oqaatigaa naapertuilluanngitsuliortoqartartoq. Tamakkua tamarmik tusaanngitsuusaarneqarput oqartoqarluni takkua uppernaasaataanngitsut. Taamaalilluni Folketingimut naammaginartumik nalunaarusiornissamik neriorsuut eqquutsinneqanngilaq, Mogens Lykketoft oqarpoq.

Naapertuilluanngitsuliorluni apersuinerit internetimi decembarip aallartilaarnerani atuarneqarsinnaapput, naalakkersuisulli nalunaarusiaanni qaammammi tassani kingusinnerusukkut saqqummiunneqartumi ilanngunneqaratik. Tassami nalunaarusiami taamaallaat tunngavigineqarput paasissutissat 2002-meersut.

Tamannali utoqqatsissutipalaajunerarlugu Frank Aaenimit Enhedslistemeersumit uparuarneqarpoq. Paasissutissanimi assigiinngitsuni februaar 2002-meersuni takuneqarsinnaavoq tigusat Kandaharimiittut naalliutsinneqartarsimasut – tassa danskit sakkutuuisa tigusaminnik Amerikamiunut tunniussinissaat sioqqullugu. Aammami taamanikkut Politikenimi Berlingske Tidendemilu allaaserisaqartoqartarpoq tigusat Amerikamiunit unatarneqarlutillu kanngunarsarneqartarsimasut.

Illuatungiliuttut oqarput paasissutissat tamakkua decembarimi nalunaarusiami ilaatinneqarsimanngitsut.