Afghanistanimi suliniutit unitsinnialerpaat

Præsident Karzai-p aalajangerneratigut Afghanistanimi ikiuiniaqatigiit suliaat arlalissuit maanna matuneqartariaqarput suliaallu maanaannaq unittussanngorlutik.

- Nakkutilliinermik suliaqartut ukioq manna naatinnagu unissasut, præsident Karzai-p aalajangerpaa. Taamalu aalajangernera inuinnarnut aammalu sakkutooqarnermut sunniuteqartussaapput.

Siuarsaanermik suliat 18-it, amerikamiunit ingerlanneqartut unitsinneqartariaqassapput, sulisut inuunerat ulorianartorsiulersussaammat.

Suliniaqatigiit suliaat inuinnarnik ingerlanneqartut, soorlu atuarfiliornerit, aqquserniornerit nunaateqarnermillu siuarsaanerit unitsiinnarneqartariaqalissapput, tamakkuninnga sulisut inuunerat ulorianartorsiortinneqalissammat sakkutuunit nakkutigineqarsinnaajunnaarunik.

Sulisut illersorniarlugit, nakkutilliinermik suliaqartunik paaqqutarineqartaraluarput.

Præsidentip Karzai-p taama aalajangernera inuinnarnik assuarineqarpoq, oqarlutik Karzai nunamini oqartussaajagaasimasoq.

Talebanit siuttuisa ilaat allallu sakkutooqatigiit Karzaip imminut illersuisunngortinniarlugit isumaqatigiinniarfigisaraluarpai, iluatsissananili.

Taamaattumillu siusinnerusukkut aalajangertariaqarsimavoq, nunat allamiut sakkutuuisa nuna qimassagaat. Taamalu peqqusinera ajutoorpoq, taarsiullugu nunami nakkutilliinermik suliaqartut taamaatinnissaat piumasaralugu.

Suliniutit ingerlanneqartut katillugit 7 milliard koruuninik naleqarput, suliniutillu unitsinneqarpata tassa aningaasat maangaannartussaassapput. Suliniutinik suliaqartut nakkutilliisunit isumagineqartariaqarput.

Naak amerikamiunit assuarineqaraluaqaluni isummani Karzai-p attatiinnarpaa.

DR-ip ilanngutassiortuata Tyge Petersenip taama tusagassaqartippaatigut.