Afghanistanimi suli akersuuttoqarpoq

Afghanistanip kujasinnerusortaani suli akersuuttoqarpoq danskillu sakkutuui isumannaallisaaqataapput. Illoqarfiilli pingaarnersaanni Kabulimi ullaaq arlaleriarluni qaartartumeerisoqarpoq. Afghanistanimi naalakkersuisut sakkutuullu eqqoriarneqarsimasut qaartartumeerisunit nalunaarutigineqarpoq.

- Nipitoorujussuarmik qaartoqartoq tusaavara kikkullu tamarmik tassanngaannaq uisakajaarlutik sumut tamaanga arpaqattaalerput, Afghanistanimi naalagaaffiup bussiinik marlunnik qaartartumeerneqartunik takunnittut ilaat taama oqaluttuarpoq.

Sakkutuut suliartortillutik bussimut ilaasut qaartartumeerfigineqarmata ataaseq toqutaavoq 40-inillu amerlanerusut ikilerneqarput.

Kabulimi ullut aappassaat taamatut qaartartumeerisoqarpoq.

Afghanistanip kujasinnerusortaani talibanit Naalagaaffiit Peqatigiit sakkutuui taakkunanngalu ikiortaasartut sakkortuumik akersuuttarput. Talibanit oqaaseqartartuutitaata nalunaarutigaa namminneq Kabulimi ulluni kingullerni qaartartumeerisarsimallutik.

Tusagassiortoq Afghanistanimilu pissutsinik immikkut ilisimasalik Eva Arnvig tamanna pillugu ima oqarpoq:

- Talibanit Kabulimi qaartartumeerisuullutik nalunaarnerat assut eqqumiiginarpoq. Talibanit saassussisarfiitik amerlisimagaat ilimagilluinnarpara saassussisarnerillu suli amerlineqarnissaat qularinngilluinnarpara, Eva Arnvig oqarpoq.

Danskit sakkutuui 290-t missaanniittut qanittukkut Afghanistanimukartinneqartussaapput.

- Afghanistanimiut amerlanersaasa nunat allamiunut akeqqersortuugamik talibaninik illersuisuupput. Assersuutigalugu 1900-kkut ingerlaneranni tuluit russillu afghanistanimiittut anisitaanikuupput. Amerlasuunik sakkugissaarluartunik sakkutuuliisoqanngippat ilimagaara taamatut nunanik allamiunik aamma anisitsinissaat, Eva Arnvig oqarpoq.