Afghanistanimi sorsunneq kukkunernik ulikkaarpoq

Sakkutuut Afghanistaniliartinneqartut siulliit pilersaarusiortup nammineq ilagai. Henry Crompton CIA-mi ukiut 20-t sinnerlugit kilitsissiaanermini Afghanistanimi Al Qaedameersunut Talebaninullu akiuiniarnermi sallersaasarsimanera pillugu atuakkiarineqartarpoq. Henry Crompton oqarpoq Afghanistanimi sorsuunneq kukkulluinnartumik ingerlanneqartoq. Sorsunnermi politikkikkut anguniagaasut sorsunnerullu ingerlanneqarnerata ataqatigiissaarnera eqqarsaatigalugit kukkusoqarsimavoq. Sanaartornissamut ikiuuttoqanngippallaarpoq, sakkulersortoqarpallaarlunilu.

Aningaasaqarnerup, peqqinnissaqarfiup atassuteqaqatigiissinnaanerullu tungaasigut, 2002-miit 2006-ip tungaanut ataqatigiissaarluakkamik suliniuteqartoqarsimasuuppat, sakkutuut nunat assigiinngitsut Afghanistanimiititaat angusaqarluarnerujussuusimassagaluarput. Kisianni kukkulluinnarsimavugut, Henry Crompton oqarpoq.

Angusaqarluarniassagutta inuiaat Afghanistanimiut ikiorniartariaqaraluarpavut. Illoqarfiit immikkoortortaat, nunaqarfiit avataannilu qooqqut toqqissisimaffigineqarsinnaanngorariarlugit, inuit suut pisariaqartinneraat tusaaniarneqarsimasariaqaraluarput, taakkualu aallaavigalugit ikiorlugit.

Maannali nunat assigiinngitsut sakkutuuisa suli ukiorpassuarni Afghanistanimiittariaqarnerat nassuerutigisariaqarparput, Afghanistanimiummi nammineersinnaalernissaat suli ukiorpassuarni anguniarneqartariaqassammat. Uani sorsunnermi Afghanistanimiut kisimik ajugaasinnaapput, tamanna aatsaat anguneqarpat sorsunneq iluatsittutut oqaatigineqarsinnaalissaaq, Henry Crompton oqarpoq.