Afghanistanimi qinerseqqittoqassanngilaq

Qineqqusaartut marluugaluarput, aappaali Abdullah Abdullah tunuaannarmat qinersisoqassanersoq nalornisigineqalerpoq.

Qanoq pisoqassanersoq oqartussat maanna aalajangiiffigileruttorpaat. Qineqqusaartoq ataasiinnaammat nalornisigineqarpoq qanoq iliortoqassanersoq, nunammi tunngaviusumik inatsisaani allassimasoqanngilaq qineqqusaartoq ataasiinnaagaangat qanoq iliortoqartassanersoq.

Islamisiortut talibanit aamma saassussinissaat aarleqqutigineqarpoq.

Aappassaaneerutaasumik qinersisoqarnissaa USA-p Tuluillu tapersersoraluarpaat, siullermik qinersisoqarmat peqquserluttuliortoqarsimammat.

Manna præsidentiusoq Hamid Karzai siullermik qinersisoqarmat ajugaasutut imminut suaarutigigaluarpoq, qinersinermulli ataatsimiititaliap tamanna aalajangiiffigisussanngoraa Karzaip oqaatigereerpaa.

Qinersinissarli taamaatiinnarneqarnavianngilaq. Peter Dahl Thruelsen, Danmarkimi illersornissamut qullersaqarfimmeersoq oqarpoq.

Qinersinermi ataasiinnaq qineqqusaarmat, qinersineq inatsisitigut akuerineqarsinnaanersoq Peter Dahl Thruelsenip apeqquserpaa.