Afghanistanimi qinerseqqittoqassanersoq naliliiffigineqartussanngorpoq
Qinersineq, isornartorsiuisorpassuit oqarnerat malillugu, annertuumik peqquserluffiuvoq, præsidentitulli qinerneqaqqittup Karzaip maanna qinersineq pillugu ataatsimiititap uppernassusaa qularnartuusutut isikkoqalersippaa.
Talibaninit toqunneqarnissamik siorasaarneqarlutik Afghanistanimiut aggustimi præsidentimik qinersineranni peqquserluttoqarsimanera maanna kikkunnit tamanit isumaqatigineqalerpoq, aamma præsident Karzaimit.
Ullumili tv-ikkut aallataatitassiap Goodmorning Amerikap aallakaatinneqarnerani, tamanna soqutaavallaanngitsoq nunamilu sorsuffiusumi ineriartortinneqarpiarsimanngitsumilu Afghanistanitut ittumi tamanna naatsorsuutigineqarsinnaasoq oqaatigaa. Taamaalilluni qinersisartut 55 procentiinit taaguunneqarnikuugami atuuffimmini ingerlannarsinnaalluni isumaqarpoq.
Taamali aalajangiinissaq Naalagaaffiit Peqatigiit tapersersugaannit ataatsimiititamit tallimanit inuttaqartumit aalajangerneqartussaavoq. Taanna piffissami matumani eqqartuivoq, qinersinermi peqquserluuteqarneq ima annertutiginersoq allaat nutaamik qinersisoqartariaqassalluni imaluunniit qinersinerup immikkoortuata aappaa ingerlanneqassanersoq, matumani Karzaip siusinnerusukkut nunanut allanut naalakkersuisorisimasani Abdullah Abdullah qineqqusaarnermi akerlerisariaqassallugu.
Aalajangiinerlu taanna nunap siunissaanut aalajangiisuulluinnartunngorsinnaavoq pitsaanerulinngivipporlu ataatsimiititamut ilaasortaasoq, Mustafa Barakzai afghanistanimiuusoq tunuarluni ippassaq nalunaarmat.
Aalajangiinerit tamakkerlutik ataatsimiititap ilaasortaanit nunanit allamiuusunit pingasuusunit aalajangerneqartarput, Barakzai naammagittaalliorluni tunngavilersuivoq.
Tamannalu Karzaip sunniiniutitut atorsinnaalerpaa. Ullumi tv-ikkut aallataatitassiami oqarpoq, qinersineq ataatsimut isigalugu ajunngitsuusoq kiffaanngissuseqartumillu tamat oqartussaaqataanerannit aallaaveqartumik ingerlasimasoq. Taamaakkaluartoq qinersineq pillugu ataatsimiititap sumulluunniit attuumassuseqanngitsumik ingerlatsinera apeqquserpaa.
Barakzaip tunuarnera tunngavigalugu nunanit allaneersunit inunnit imaluunniit naalakkersuisunit ataatsimiititap aqunneqannginnini uppernarsartariaqaraa Karzaip oqaatigaa.
Barakzaip ataatsimiititamut ilaasortaajunnaarneranut illuatungiliuttut oqaaseqartartuata ilaatigut oqaatigaa Karzaip nukappiaraatigigaa,
nunallu allat akuliunnerannik oqariartuutaa Karzaip nammineerluni isumassarsiaraa. Afghanistanillu oqaluttuassartaani nutaanerpaami qinersineq pillugu ataatsimiititap aalajangiinissaa immaqa pingaaruteqarnerpaaq taamaaliornermigut apeqquserlugu.
