Afghanistanimi præsidenti Iranimit akilersittarnerarpaat

Afghanistan-imi præsident Hamid Karzai-p atorfilittaminut pisortarititaa Iran-imit pisiaavoq, tassanngalu akilerneqartarlunilu, taama Amerikami tusagassiorfiit tutsuiginartut akunnerup naanerani allapput.
oktobarip 25-at 2010 11:47

Tusagassiorfiit USA-mi præsidentip qanimut sulisui tunuliaqutaralugit taama allapput. Akerlianit atorfillit pisortaata suliassaraa præsidentip illorsuata iluani USA aamma NATO ajortisassallugit.

Tamanna præsidentip illorsuani ullaakkut ataatsimiinermi nalinginnaavoq. Afghanistanimiut isaanit tassaasarpoq atorfillit pisortarisaata Omar Kavutsai-p præsidenti nunarsuup sinnerani pisimasunik ilisimatikkaa. Præsidentip sulisui allat taanna ataatsimiineq taasarpaat aaqqissuussamik kukkusunik paasissutissiinermik, taamatullu oqartup tamanna taavaa 'angakkuarnermik'.

Akerliani præsident Hamid Karzai-p ilisimalluarpaa naalakkersuisuni minuttit arlallit atangaarnavianngitsoq USA-mit tapersersorneqanngikkuna, akerlianilli Karzai-p Iranimiut amerikamiut pillugit isumaat tusaaniarsaralugit. Soorunami præsidentip atorfiliisa pisortaat Kavutsai suliaminut akilersittarpoq.

Assersuutitut saqqummiunneqarpoq præsident Karzai pisortatigoortumik Iranimi tikeraartoq. Timmisartua mittarfimmi piareersimavoq præsidentip Kabulimut angerlarnissaanut. Kavutsai inimini issiavoq Iranip ambassadøria timmisartumut ikimmat sanianullu ingeriarluni puussiaq euro-passuarnik imalik Kavutsai-mut tunniullugu. Aningaasarpassuit taakku Kavutsai-mut kisimi ingerlaneq ajorput, aammali Afghanistan-imi USA-mut akerliunianut agguaanneqartarlutik.

Iranip tassani anguniagai tassaapput Afghanistan-ip USA-p aamma Nato-p akornanni pissutsit pitsaasuunnginnissaat. Imaanngilaq Iranip Taleban tapersersormagu, International Herald Tribune-li malillugu Iranimut pingaarneruvoq USA-p Irakimisulli misigisaqarnissaa Taleban-it ataatsimeeqatigineraninngarnit.

Afghanistanip præsidentiata Hamid Karzaip, nassuerutigeqqammerpaa taama pisoqartarnera ilumoortoq nassuiaatigalugulu aningaasat 5-700.000 euro ukiumut ataasiarlutik marloriarlutilluunniit nunamit inussiarnersumit pissarsiarisarlugit, nutaarsiassaqartitsivik APN allaaserinnippoq.