Inuk ataaseq imminuutigaluni meeqqat akornanni Afghanistanip kujasinnerusortaani ullumi qaartippoq. Meeqqat annaqqarput, canadamiulli sakkutuui sisamat toqutaapput.
Pikititsisut talebanit tamakkerlugit Afghanistanip kujasinnerusortaanit ippassaq anisissimagitik NATO-mit nalunaarutigineqarpoq:
Qaartartumeerinnittumik takunnittoq oqaluttuarpoq meeqqat allaffissianik aqerluusanillu sakkutuut aggualeruttoraat, qaartartumeerisoq sikkilerluni akornannut pulariarluni imminut qaartissimasoq.
Afghanistanimi pissutsinut ministereqarfimmit nalunaarutigineqarpoq, sakkutuut sisamat toqusimasut 24-illu ikiligaallutik. Ikiligaasut amerlanersaat meeraapput.
Nunat tamat sakkutuui Afghanistanimi pikitsitsisunik talebaninik akiuiniarneranni 130-t ukioq manna toqutaareerput. Afghanistanip kujasinnerusortaani talebanit 2001-mi anisitaareerlutik nunat tamat sakkutuuinut maannamut suli akersuupput.
Talebanit tamakkerlugit Afghanistanip kujasinnerusortaanit iluatsittumik ippassaq anisissimagitik NATO-mit nalunaarutigineqarpoq. Talebanilli ullumikkut qaartartumeerimmata iluatsilluarsimanngitsoq paasinarsivoq.
NATO Afghanistanimi 20.000-inik sakkutooqarpoq. Taakku affaasa missaat Afghanistanip kujasinnerusortaaniipput. Amerikamiut taakku amerlaqataasa missaannik Afghanistanimi sakkutooqarput.
Talebanit akiorneqarneri ilimagisamit sakkortunerummat NATO-p massakkorpiaq sakkutuut Afghanistanimiittut amerlineqarnissaat sulissutigaa.
Afghanistanip illoqarfiisa pingaarnersaanni, Kabulimi, inuk ataaseq imminuutigaluni imminut ullumi qaartippoq. Politiit pingasut taamaasisoqarnerani toqupput.