Afghanistanimi kingumut qaartartumeeripput

Afghanistanimi amerikamiut sakkutooqarfianni ullaaq qaartitsisoqarpoq, USA-p præsidentimut tullersortaata, Dick Cheney-p, tamaaniinnerani. Qaartartumeerineq, sakkutooqarfiup isaariaata silatinguani pisoq, imminuutigaluni qaartartumeerinerusoq paasineqarpoq. Tamaani guvernøri ilisimatitsivoq, 20-t missaanniittut toqutaasut. Toqutaasut amerlanerit afghanistanimiuupput, nutaarsiassaqartitsivilli Reuters naapertorlugu, toqutaasut sakkutuunik nunani allamiunik aamma ilaqarput. Præsidentimut tullersorti ajoquserneqanngilaq. Qaartartup qaarnerata nalaani taanna sakkutooqarfimmi isumannaatsumiissimasoq, sakkutooq nutaarsiassaqartitsivimmut AP-mut oqaaseqartartoq ilisimatitsivoq. Amerikamiut sakkutooqarfiat Afghanistanip illoqarfiisa pingaarnersaata, Kabulip, avannaatungaani kilometerinik 60-inik avannarpasitsigisumi inissisimavoq. Nutaarsiassaqartitsivik Reuters naapertorlugu saassussineq Talibanikkunnit akisussaaffigeqarnerarsimavoq.