Afghanistanimi inatsisartunut qinersisoqarpoq

Qinersiviit nalunaaqutaq sisamanut matuneqarput, tassa maani nalunaaqutarput naapertorlugu ullaap tungaani nalunaaqutaq qulinut qiteqquttoq, maanilu nalunaaqutarput naapertorlugu arfineq pingasut eqqaanni qinersisartut 32 procentii qinersiartorsimasut, Qinersinermi Ataatsimiititaliap Arlaannaannulluunniit Attaveqanngitsup pisortaata eqqoriarpaa.

Afghanistanimi qinersisartut 10,5 millionit missiliorpaat.

- Qinersiartortut amerlassusaat marloriaatinngorsinnaassappata, ilimagaaralu taakku marloriaataanit amerlanerusut qinersiartorumaartut, taava qinersineq iluatsilluartutut taaneqarsinnaassaaq, Qinersinermi Ataatsimiititaliap Arlaannaannulluunniit Attaveqanngitsup pisortaa nutaarsiassaqartitsivimmut Ritzauimut oqarpoq.

Nalunaaquttap akunnerata ataatsip matuma siornagut ilisimatitsissutigineqarpoq, 3,6 millionit qinersiartorsimasut.

Ulloq qinersiviusoq eqqissisimasuinnarmik ingerlasimanngilaq, tassami qaartartunik igeriuttakkanik qaartartunillu allanik qaartitsisoqarneratigut ikinnerpaamik arfinillit toqutaammata.

Inatsisartuni underhusimut qinigaasussat 259-iupput, qinigassanngortittullu 2514-iullutik, taakkunannga arnat 406-iullutik.

Ullormi qinersivimmi isumannaatsuunissaq eqqissisimasoqarnissaalu anguniarlugit, NATOp sakkutuui 150.000-it nakkutilliitinneqarput.