Afghanistanimi eqqissiviilliorneq nunap avannaanut annguppoq
Afghanistanip avannarpasinnerusortaani, nunap sinneranut naleqqiullugu eqqissisimaffiusumi, qaartartumeerineq ukiuni kingullerni arfinilinni sakkortunerpaavoq.
Afghanistanip avannaani, Barklandimi, ippassaq qaartartumeerisoqarmat inuit 40-t toqutaammata 80-illu ikiligaallutik, ullumi inuit untritillit arlallit aliasullutik iliseqataapput. Inatsisartunut ilaasortat arfinillit meeqqallu arlaqartut toqutaasunut ilaapput. Præsident Hamid Kasai ilisisunut ilaavoq, pisimasorlu pillugu iternga tikillugu paasiniaasoqarnissaa naalakkiutigisimavaa. Afghanistanimi aatsaat qaartartumeerisoqalinngikkaluarpoq, ukiummi massuma ingerlanerinnaani 130-riarluni qaartartumeerisoqareerpoq, ippassarli qaartartumeerinerup allaassutigaa nunap avannarpasinnerusortaani pigami, tamaani inuiaat ikinnerussuteqartut Tertjikkit muslimillu ingasaassiniat Osama Bin Ladenimut al-Qaedamullu atassuteqarnerarneqartartut najumassimanartorsiortitsisarput. Afghanistanimi talebanit qaartartumeerigajunnerpaapput, ippassarlumi qaartartumeerisoqarnerata kinguninngua talebanit pisuutinneqaraluarput, talebanilli pisuunatik nalunaarput. Sakkutuut nunanit assigiinngitsuneersut 50.000-it Afghanistanimiipput, amerlanersaalli nunap kujasinnerusortaaniipput, mannalumi tikillugu nunap avannaa eqqissisimaffiugaluartoq, soorluli aamma eqqissiviilliorfiunialinnguatsiartoq.
