Toqumut pillagaasoq aallaaneqarluni toqutaasoq, Talibanit oqaaseqartitaata Twitterikkut allaaseraa.Assi: AFP/Ritzau Scanpix

Afghanistanimi angut toqumut tamanut takuneqarsinnaasumik toqumut eqqartuunneqartoq

Tamanut takuneqarsinnaasumik toqumut pillaaneq, ujaqqanik milluuineq, iperartuineq avatiiaanerlu pillugit malittarisassanik atortitsisoqalissasoq, Talibanit qullersaata peqqussutigaa.

Afghanistanimi angut toqutsisimasutut toqumut eqqartuunneqartoq, Afghanistanip kippasissortaani tamanut takuneqarsinnaasumik pingasunngornermi toqutaavoq.

Islamisiortut Talibanit pissaanermik siorna aggustimi tigusimmatali, toqumut eqqartuunneqarsimasumik tamanit takuneqarsinnaasumik aatsaat toqutaasoqartoq oqaatigineqarpoq.

Afghanistanimi eqqartuussisut Islamip malittarisassaannik atortitsisoqalernissaa, Talibanit qullersaata qaammatip siuliani peqqussutigaa.

Tamanut takuneqarsinnaasumik toqumut pillarneqarsimasumik toqutsinerit, iperartuinerit, ujaqqanik milloorneqarluni toqutaanissamik eqqartuunneqarsimasumik toqutsinerit tillinniarsimasutullu eqqartuunneqarsimasut assaasa kipineqarnissaat taakkununnga ilaapput.

Tamanut takuneqarsinnaasumik kingorna iperartuisoqarsimasoq oqaatigineqarpoq.

AAMMA ATUARUK FN-miit nalunaarusiaq: Taliban eqqartuusinertaqanngitsumik toqumik pillaasaqattaartoq

Afghanistanip kippasissortaani illoqarfimmi Farahmi toqumut pillagaasimasumik pingasunngornermi toqutsineq pillugu Talibanit siullerpaamik nalunaaruteqarput.

Innuttaasut ilaat Tajmirimik atilik, nunap immikkoortuani Heratimeersup Ghulam Sarwarip ernera, toqumut pillagaanermi kingorna toqutaasoq Talibanit nalunaarutigaat.

Taanna angummik toqutsisimasutut, toqutaasullu motorcykelianik aallarussisimasutut, oqarasuaataanillu angallattakkamik tillissimasoq oqaatigineqarpoq, taamalu toqumut pillagaalluni.

- Toqutaasup ilaqutaanit ilisarineqarsimavoq, Talibanit oqarput.

Toqumut pillagaasoq aallaaneqarluni toqutaasoq, Talibanit oqaaseqartitaata Twitterikkut allaaseraa.

Toqutaasup angutaata toqumut pillagaasoq aallaallugu toquppaa, eqqarasuartaat Kalashnikov atorlugu pingasoriarlugu aallaallugu, Talibanit oqaaseqartitaat oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl