Afghanistan USA-lu peqqarniisaarniarnermut akiuiniaqatigiissapput

USA-mi oqartussat peqqarniisaarniarnermik akiuinermik suliniarnertik qanittukkut eqqartulerpassuk Afghanistanimi oqartussat peqataassapput. Taama piumasaqartuuvoq Afghanistanimi præsidenti Hamid Karzai, amerikamiut Aasiap kujataani aallartitaat, Richard Holbrooke oqaloqatigereerlugu.
Allattoq Najaaraq Egede
februaarip 15-at 2009 16:59

Afghanistanimi oqartussat uparuartugaat tassaavoq amerikamiut sakkutuuisa talibanit akiuuttartuinik malersuinerminni sakkutuujunngitsut toqutaat amerlavallaartut.

Illuatungaani USA-mi oqartussat uparuartorpaat, naalakkersuisut Kabulimiittut talibaninik akiuinianngippallaarnerat. USA-p maluginiarpaa talibanit saassussisarneri akulikinnerulersimasut sakkortunerulersimasullu.

Præsident Barack Obama peqqarniisaarnianik akiuiniarluni suliniarnerup nalilersoqqinnissaa sapaatip-akunnera kingulleq piumasaraa. Nalilersueqqinnerlu Nato-p apriilimi ataatsimiinnginnerani naammassissangatinneqarpoq.

Danmarki tassaavoq nunat Afghanistanimi sakkutooqartitsisut akornanni inuttussuseq eqqarsaatigissagaanni agguaqatigiissillugu toqutaasoqarnerpaasartoq, taama nutaarsiassaqartitsivik Ritzau ullumi allaaserinnippoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq