Afghanistan angalaffissaanngilaq

Afghanistanimi nunap ilarujussua angalaarfigissallugu ulorianarsiartuinnarpoq. Inatsisaatsuuneq siaruaakkaluttuinnarpoq tamatumalu kinguneranik naalagaaffiup pilerseqqinniarnera ajornakusoornerulersoq ikiuiniaqatigiiffiit arlalissuit nunap ilaaniittut oqaatigaat.

Afghanistanimi sumiiffiit ilaanni lastbilit arlariit angutinit takornartanit sakkulersorsimaqisunit unitsinneqarput. Lastbilini aquttut tigummineqarput lastbilillu usii bilinut usisaatinut minnerusunut nutserneqarput, taava bilit sumut tamaanga ingerlaqqipput lastbilillu useqaratik ingerlaqqissinnaalerput.

Qaammatit kingulliit marluk ingerlaneranni FN-imit ikiuiniaqatigiit inuussutissanik angallassisut aqqaneq-marloriarlutik taama misigisaqartarput, siornatigut taama misigisaqarfiuneq ajoraluartuni.

Taamatut ujajaasut nassaarineqarneq ajorput taamaalioqqinnissamullu kajumissaarisutut illutik.

Inunnik aallarusseriarluni toqutsinerit, ikiuiniarlutik angallassisunik ujajaanerit assigisaalu nalinginnaaleraluttuinnartut ikiuiniaqatigiiffinnit assigiinngitsunit hunnorujut missaanniittunit oqariartuutigineqarpoq.

Nunap ilaa annerujartuinnartoq aamma avannaa inatsisaatsuliorfigineqaleraluttuinnarpoq. Iluarsaaqqilluni sanaartorniarnerit taamaatiinnarneqartarput imaluunniit aallartinneqarneq ajorlutik.

Taamatut ingerlasoqarnera tuniluuttutut ittarpoq. Innuttaasut amerliartuinnartut inatsisaattutut inuuneq alliartuinnartoq misigigaangamikku, ikiuiniartoqanngippat iluarsaaqqittoqanngippallu pikitsitsiniatut inuuneq orniginerulersarpaat.

Tamatuma kingunerisaanik NATO-p sakkutuui eqqissisimatitsiniarlutillu inatsisinik malitsitsiniartussat ajornartorsiornerulerput. Tassa pikitsitsinianut akiuunnerminni inuinnarnik amerlanerusunik toqutsisariaqartaramik.

Toqqissisimannginneq inatsisaatsuunerlu pissutigerpiarlugit talebanit ukiut qulit matuma siornagut Afghanistanimi naalakkersuisunngorput. Taama pisoqaqqinnissaa ikiuiniaqatigiiffiit ernummatigaat.