Afganistanimi qinersineq ilimagisamit eqqissisimaneruvoq

Qasserpiaat qinersiartorsimassanersut maanna pissanngatigalugu utaqqineqarpoq.

NATO-mi qullersap Anders Fogh Rasmussenip Afghanistanimi qinersinerup ingerlanneqarnera naammagisimaarpaa.

Nalunaarutigineqartut siulliit isumalluarnaqaat, taanna oqarpoq. Qinersiviit naatsorsuutigisamit amerlanerusut ammatinneqarput. - Tamanna Afghanistanimiut demokratiimik kiffaanngissutsimillu kissaateqarnerannut aamma peqqarnissaarniarnermut akuersaannginnerannut takussutissaavoq, Anders Fogh Rasmussen oqarpoq.

Taamatut naliliineq Afghanistanimi EU-p politiivisa pisortaanit Kaj Wittrupimit isumaqatigineqarpoq.

- Tamanna isumaqatigilluinnarpara. Isumaqarpunga qinersineq ajunngilluinnartumik ingerlanneqartoq. Ulloq suli qaangiutinngikkaluartoq ajunngitsumik naammassineqarnissaa isumalluarnartoqarpoq. Annerusumik nakuuserniartoqarnissaa naatsorsuutigisimagaluarparput. Maani Khabulimi qaartartumeerinerit tallimat arfinillilluunniit akersuunnerillu annertunngitsut naammattoorpavut. Annerusumilli ajoqusiisoqanngilaq. Maani illoqarfimmi angalaartilluni politiit sakkutuullu nakkutilliilluarnerat takuneqarsinnaasoq nuannaarutigeqaara, Kaj Wittrup naggasiivoq.