Afganistanimi eqqissinissaq pillugu nunat 72-it ataatsimiilerput
Afghanistanimi eqqisseqatigiittoqassappat, tamanna anguniarlugu nunat eqqaamiorisai suleqatigiittariaqarput. Tamannaavoq Afghanistanip nunallu eqqaamiorisaasa siunissaat pillugu Amerikamiut nutaamik periuseriniagaat.
Taamaattumik naalagaaffiit NATOp sakkutooqartitsineranut peqataasut naalagaaffiillu Afghanistanip sanilerisai ullumikkut Haagimi katersuutsinneqarput, taakkua ilagaat Iran.
Iranimi nunanut allanut ministerip tullia ataatsimiinnerup aallartinnginnerani oqarpoq, Afghanistanimiut nunagisaminnut oqartussaanissaat pingaartorujussuusoq. Taassuma aamma erseqqissarpaa, sakkutuulersorluni pissaanilersorneq eqqisseqatigiinnermik kinguneqarnavianngimmat. Nunani allamiut Afghanistanimi sakkutooqartitsinerat, eqqisseqatigiinnermik, isumannaatsuunermik patajaassusermillu pilersitsinavianngillat. Taamaalilluni Amerikamiut nunanut allanut ministeriat Hillary Clinton isumaqatigaa, taannami ataatsimiinneq sioqqullugu oqarpoq, sakkutooqartitsineq kisimi aaqqiiniutissaanngitsoq. Neriuutigalugulu ullumikkut ataatsimiinnerup kingornagut periuseriniarneqartoq piviusunngortillugu suliniartoqalissasoq.