Telep ADSL-mik siorna decembarimi atulersinneranit internetimut ADSL-mik attavillit maanna 3000-ngorput, ADSL-itaarusuttullu amerlangaarmata ilimaginngisamit ajornartorsiortitsilersimavoq. Atortussalli sanaartortumit Siemensimeersut nassiussat periarfeerunneqarput, sumullu pisimanersut qaqugulu nutaanik takkuttoqassanersoq ilisimaneqanngilaq.
- Siemensimut saaffiginnissuteqartoqareerpoq, pilersuisinnaasunilli allanik aamma misissuivugut. Tele internetikkut nittartakkamini allappoq.
Aasianni, Nuummi, Qaqortumi, Sisimiuni, Tasiilami, Upernavimmi Uummannamilu ADSL-ikkut atassuteqartoqanngilaq. Nammineerluni ikkussugassat sumiiffinni arlalinni nungussimapput, illoqarfinnulli attavilinnut agguaassisoqaqqittoq, Tele allappoq.