USA silaannakkut angallannermi alapernaarsuummik Pituffimmi radareqareerpoq (assi, aaqq.).

Adjunkti: USA-p nunatsinni amerlanerusunik radareqalersaarnera piviusorsiorneruvoq

Naalakkersuisut, danskit naalakkersuisuisa Pentagonillu USA-p nunatsinni amerlanerusunik radareqalersaarneranik nutaarsiassaq oqaaseqarfigerusunngikkallarpaat. USA amerlanerusunik radareqalerpat nunatta iluaqutigissagaa, immikkut ilisimasalik naliliivoq.

USA-p Issittumi immakkut silaannakkullu angallannermik alapernaarsuinerunissamik ukiorpassuani anguniagaqarnera tusarnartaanngilaq.

Taamaammat USA-p Kalaallit Nunaanni amerlanerusunik radareqalersaarnera piviusorsiornerusoq, Ilisimatusarfimmi adjunkti Nasiffimmilu tassa Ilisimatusarfimmi nunanut allanut sillimaniarnermullu sammisaqarfiusumi pisortaq Rasmus Leander Nielsen oqarpoq. 

- USA-p Kalaallit Nunaanni alapernaarsuinerusoqartariaqarnerarlugu ukiorpaalunngortuni isornartorsiortarpaa.

- USA (Kalaallit Nunaanni, aaqq.) amerlanerusunik radareqalerumaartoq ilimanartupilussuuvoq, taanna oqarpoq.

AAMMA ATUARUK Radarit amerlanerusut pillugu immikkut ilisimasalik: Kalaallit Nunaata nakkutiginissaanut USA erinitsavippoq

USA-p soorlu russit kinamiullu nunatsinni immakkut angallannerat alaatsinaannerujumallugit Issittumi nunatsinniit alapernaarsuinerulerusuttoq, nittartakkakkut nutaarsiassaqartitsivik Altinget Arktis sapaatit akunnerata siuliani allappoq.

Isumaqatigiinnialeruttortut

Naalakkersuisut, USA-p illersornissaqarfiata Pentagonip danskillu naalakkersuisuisa USA alapernaarsuinerulissanersoq KNR-imut oqaaseqarfigerusunngikkallarpaat. 

Taakkuali USA-p anguniagaqaqatigiinnermik 2018-imi nalutaarutaa innersuussutigaat. 

USA sakkutooqarnikkut alapernaarsuinikkullu nukittorsaarusuttoq taavalu sakkutooqarnermut sakkutuujunngitsunullu tunngasunut aningaasalersuisalerusuttoq, USA-p illersornissamut ministereqarfia nalunaarummini ilisimatitsivoq.

USA-p taamaaliorusunnerminik taamanikkut nalunaaruteqarnera nunatsinni mittarfiit tallilerneqarnissaannut aningaasaleeqataarusunnerattut paasineqarpoq, aningaasaleeqataanikuunanili. 

Københavnimi illersornissamut ministereqarfik KNR-imut ima allappoq:

- USA, Danmark Kalaallit Nunaallu amerikamiut anguniagaqaqatigiinnermik nalunaarutaat tunngavigalugu sulinissaq pillugu oqaloqatigiittarput. Aatsaat aallartinnisaleruttoratta suli isumaqatigiissuteqanngilagut.

Nunanut allanut tunngasunut naalakkersuisoq, Vivian Motzfeldt (S), tamanna pillugu isumaqatigiissuteqartinnagit oqaaseqarusunngilaq. Vivian Motzfeldtili nunanut allanut tunngasunut aamma 2018-imi naalakkersuisuuvoq, USA-lu anguniagaqaqatigiinnermik taamanikkut nalunaaruteqarmat iluarisimaarpaa.

USA-p illersornissamut ministereqarfiata Pentagonip oqaaseqartartua sakkutuut naalagaasa ilaat, oberstløjtnant Anton T. Semelroth, KNR-imut ima aamma allappoq:

- USA-p Kalaallit Nunaanni sillimaniarnermut aningaasalersuinissaq pillugu anguniagaqaqatigiinnermik 2018-mi nalunaarumminik naammassinninnissani suli pisussaaffigaa, aamma kunngeqarfik Danmark Kalaallit Nunaanni maanna sillimaniarnermut tunngasuni pingaarnersiueqatigisarpaa.

Pitsaaqutit: Attavigiilluarnerulersinnaassasut unioqqutitsillunilu aalisartunik alapernaarsuisoqalersinnaassasoq

Kalaallit Nunaanni amerlanerusunik radareqalerneq nunatsinnut pitsaaquterpassuaqarsinnaasoq, Rasmus Leander Nielsen oqarpoq.

Radarimmi paasissutissanik pingaarutilinnik sakkutuuniinnaanngitsoq aammali sakkutuujunngitsunit maanna aallerfiusinnaapput.

- Tamanna Kalaallit Nunaanni aalisarnermi nakkutilliinermut, silap pissusiata allanngoriartornera pillugu paasissutissarsiornermut aatsitassarsiorfiusinnaasunillu sumiissusiinissanut iluaqutaasinnaavoq. Amerikamiullu Kujataani taamaaliornikuungaatsiarput, Rasmus Leander Nielsen oqarpoq.

Amerikamiut maanna Pituffimmiinnaq radareqarput. USA-lu nunatta sinnerata ilaani sakkutooqarfeqalertigani Igalikumi isumaqatigiissut naapertorlugu nunarput isumasioqatigeqqaartussaavaa.

- Kujataani, Tunumi, Kangerlussuarmi imaluunniit Nuup eqqaani radariilersuiniaruni Kalaallit Nunaannit itigartinneqarataannaammat allatut iliortariaqassaaq , Rasmus Leander Nielsen oqarpoq. 

Amerikamiut Skotlandip Islandillu akornanni alapernaarsuinerunissamut Savalimmiuni radariliinissaannut danskit naalakkersuisui siorna akuersipput. Savalimmiulli tamatumunnga akuersiteqqaartinnagit taamaaliornerat isornartorsiorneqarpoq. Radariliinissaali Savalimmiut akuersaassagaat Lagtingip nunanut allanut tunngasunut ataatsimiititaliaata inassutigaa.

Nunarput Kalaallit Nunaata sinnerata ilaani radarilersuinissamut itigartitsisinnaasoq, taamaaliorpalli USA-lu attaveqatigiilluarnerannut akornutaangaatsiarsinnaallunilu Washington D.C-mit maalaarutigineqarsinnaasoq, Leander Nielsen oqarpoq.

- Tunngaviatigut itigartitsisinnaavoq, taamaaliussappallu qularinngilluinnarpara tamatuma Kalaalllit Nunaannit Danmarkimillu peqataaffigineqartumik inatsisitigut akuerineqarsimanissaa piumasarissagaa. USA-lu maalaarataannaavoq, isumaqaramimi Kalaallit Nunaanni amigartumik alapernaarsuisoqartoq, Rasmus Leander Nielsen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl