ACU: Timmisartuni saqisunit allanit pitsaannginnerusumik atugassaqartitaavugut
Apeqqut tamanna Air Greenlandimi saqisut peqatigiiffianni siulittaasumut Anders Mark Jensenimut, pingasunngorpat unnukkut nalunaaqutaq arfineq-pingasuniit suliumajunnaarnissamik sioorasaaruteqartumut apeqqutigaarput.
- Maanna inissiffipput naammaginanngikkaluaqaaq, kisianni tassa isumaqatigiissitsiniartartoq isumaqatigiissitsiniarnermini ingerlaqqissinnaajunnaarmat suliumajunnaartariaqarpugut. Apeqqutit pingaarutillit isumaqatigiissutigisinnaasimanngilavut, isumaqatigiissutigisaraluatta ilaasortatinnit itigartitsissutigineqarnerata kingornagut, Anders Mark jensen oqarpoq.
Taanna aperineqarami suut isumaqatigiinngissutigineqaraat, akivoq ilaatigut akissarsianut tapit, utoqqalinersiat timmisartumilu qassit sulisarnissaannut tunngasut isumaqatigiinngissutaasut.
Anders Mark Jensen aamma oqarpoq Air Greenlandimit isumaqatigiissuteqarniarluni ilungersuuteqarsimanerarluni oqarneq isumaqatiginagu. Oqaatigaluguli aaqqiagiinnginnerup nalaani oqaloqatigiinniarneq ajornakusoorsimaqisoq. Tassami qaammatip missaa tusarfiginnginamikkik suliumajunnaarnissamik sioorasaarigamik aatsaat oqaloqateqarnialersimanerarlugit.
Anders mark Jensen aperineqarami Air Greenlandimi saqisut timmisartuutileqatigiiffinni allani saqisunut naleqqiullugit pitsaannginnerusunik atuagassaqartitaanersut, taanna akivoq arlalippassuartigut pitsaannginnerusunik atugassaqartitaallutik.
Illuatungeriit isumaqatigiinniaqqilernissaannut piffissamik nutaamik isumaqatigiissuteqartoqanngilaq. Aamma Christian Kjeldsenip isumaqatigiinniarnissamut qanittukkut qaaqqusisoqarnissaa ilimaginngtilaa, tassami angusaqarniarluta ilungersuuteqareeraluarpugut, oqarpoq.
