Abramovich qinigassanngorteqqinniarpoq
Russip pisoorsuup Abramovichip Ruslandimi nunap immikkoortuani naggueqatigiit Inuit nunaanni Tjukotkami guvernøritut tunuarneranit sapaatip akunneri arlaqanngitsut qaangiutiinnartut, nutaarsiassaqartitsivik Reuter nalunaarpoq, Abramovich guvernørissarsiorluni oktobarimi qinersinissamut qinigassanngortinneqarnissaminut akuersisimasoq.
41-nik ukiulik miliuunerpassuaatilik taanna, tuluit arsaattartut klubiannik Chelseamik piginnittutut nunatsinni ilisimaneqarnerusoq, nunap ilaani avannarpasissumi, naggueqatigiit Inuit nunaanni guvernøritut 2000-imi qinigaavoq. Taanna Tjukotkami inuuniarnikkut atukkanik pitsanngorsaaniarluni miliuunerpassuarnik atuisartutut ilisimaneqarpoq.
Sapaatip akunneri arlaqanngitsut matuma siornagut guvernøritut tunuarmat, Abramovich Tjukotkami innuttaasunit amerlaqisunit qinigassanngorteqqeqqullugu kajumissaarneqartartoq, nutaarsiassaqartitsivik Reuter nalunaarpoq, oqaaseqartartuatalu ippassaq nalunaarutigaa, Abramovich qinigassanngorteqqinniarluni aalajangersimasoq.
- Inuppassuarnit kajumissaarneqarnermigut tapersersorterpassuaqarnini uppernarsigaa oqaaseqartartuata oqaatigaa.
2000-ip kingorna Abramovichip nunap immikkoortuani taama ungasitsigisumi, Moskvamit 15 tiimit timmisartoqqaarluni tikinneqarsinnaasumi sooq qinigaanersoq oqaluuserineqartaqaaq.
Ilaat isumaqarput uulia aatsitassallu Tjukotkamiissangatinneqartut patsisaasimassasut, ilaasali ilimagaat Ruslandimi nunap immikkoortortaanik piitsuunerpaamik aningaasanik atuinissaminik Putinimik isumaqatigiissuteqarsimassasoq.
Nunatsinni ICC-p siulittaasuata, Aqqaluk Lyngep Abramovichip qinigassanngorteqqinniarnera nuannaarutigalugu ullumi oqaatigaa.
- Abramovich 2001-imiilli ICC-mit suleqatigilluarparput, qinigassanngorteqqinniarneralu naggueqatigiinnit Inunnit Ruslandimiittunit nuannaarutigineqaqaaq, Aqqaluk Lynge oqarpoq oqaatigalugulu Abramovichip suleqataasa ilaanik sapaatip akunnerata tulliani Københavnimi ataatsimeeqateqassalluni, tamatumalu kingornagut marluullutik Alaskamut Nomemukassallutik, tasamani ICC-p siulersuisuisa aggustip arfernanni ataatsimiinnissaani peqataasussaagamik.
