Abel Jakobsen ukioq manna aqutsisuullammanngorpoq: Peqatigiiffiup ingerlalluarnissaa pingaartitarigaa

Ukioq manna Maligassiuisut nersornaasiineranni Abel Jakobsen Qaqortumeersoq aqutsisuullanngortinneqarpoq. Tamanna naatsorsuutigisimanngikkaluarlugu, oqaatigaa.
- Uanga nammineq pingaartikkakku qaannap tammatsaalineqarnerani suleqataasallunga. Qaaniorusuttut sungiusarusuttut tamarmik tikilluaqqujuaannavippagut, tamaammat ilaasortat amerlasinnaapput. Assi © : KNR / Jørgen Semionsen
novembarip 18-at 2020 15:38

Maligassiuisut show arfininngormat aaqqissuunneqarmat nunatsinni timersortartut nammineq kajumissutsiminnillu peqatigiiffilerisut nersorniarneqarput.

Matumanilu Qajaq Qaqortup siulittaasua, Abel Jakobsen ukioq manna aqutsisutsialattut nersornaaserneqarpoq. Taanna peqatigiiffimmi aamma sungiusaasuuvoq.

Nersornaaserneqarnera aamma 25.000 koruuninik aningaasartaqarpoq. Taassumali ukioq manna aqutsisuullattut nersornaaserneqarnissani eqqarsaatigisimanngikkaluarpaa.

- Nersornaasinnerit allallu naatsorsuutiginngisaannarpakka, aamma naatsorsuutigunnanngilakka, tamakku pillugit suliniuteqassaguma kukkunerussagami, nersornaaserneqartoq oqarpoq.

Qaqortumi qaannap peqatigiiffiani 70-it missaannik ilaasortaqarpoq.

- Uanga nammineq pingaartikkakku qaannap tammatsaalineqarnerani suleqataasallunga. Qaaniorusuttut sungiusarusuttut tamarmik tikilluaqqujuaannavippagut, tamaammat ilaasortat amerlasinnaapput.

Taassuma nunatsinni qaannamik ukioq manna pissartanngorniuuttoqartussaagaluarnera corona pillugu malittarisassat kingunerisaanik taamaatiinnarneqarnera uggoraa.

- Qiasunngunaqaaq ilumoortumik, aatsaat taamak pissanganartigisumik Qajaq Qaqortoq inissisimagami. Allunaariaqattaarnermut, parrunnermut, aatsaat taamak pissanganartigisumik inissisimagami ukioq manna, tamaammat uggornaqaaq coronap killilersuinera eqquimmat ukioq manna.

Abel Jakobsenip nunatsinni pissartanngorniuunnerit aappaagu aaqqissuunneqarsinnaanissaat neriuutaasa annersaasa ilagaat.

- Neriunnaqaaq ukiup tulliani piviusunngorsinnasasoq Qajamiuinnaangikkaluartoq soorlu arsamik allanillu pissartanngorniunnerit piviusunngornissaat neriuutigeqaarput.

Qanoruumit ilanngutassiaq uani takuuk:

 

Maligassiuisut Qaqortoq Abel Jakobsen