Aaverpassuit nunamut qallortut
Ukiut sisamat ingerlaneranni pingajussaa aaverpassuarnik Alaskap avannamut kimmut sineriaani takusoqarpoq.
Nunaqarfeeqqami qatserisartut pisortaat Bill Tracey eqqoriaavoq tamaani aarrit 20.000-it angullugit amerlassuseqassagunartut, Siku News allappoq.
Ukiut kingulliit ingerlaneranni immap sikua avannarparaluttuinnarpoq. Tamatuma kinguneranik aarrit neriniarfigisartakkatik qimallugit siku itinerusumut malinnaaffigisinnaavaat imaluunniit nunamut qallorsinnaallutik, aarrit pillugit ilisimatusartoq Chad Jay Anchoragemeersoq oqarpoq.
Ilisimatooq alla Alaskami Wildlife Service’s Marine Mammal Programmemeersoq oqarpoq, aarrit takkussuunnerat nunarsuup kiatsikkiartorneranut toqqaannartumik attuumassuteqartoq.
Rosa Meehan oqaluttuarpoq, aarrit ataatsimoortorpassuit Alaskap avannamut sineriaani 2007-imi takkuttalersimasut.
Aappaaguani immap sikua ajornartorsiutaanngilaq, kisianni siorna aarrit nunamut qalloqqilerput.
Aaverpassuit ukiut tamaasa sinerissamut pineqartumut utertalissappata qanittumi nerisaqarfiit nungusarneqalissapput taamaalillutillu siunissamut suli ungasinnerusumukartariaqalissallutik, Rosa Meehan oqarpoq.
