Aavernit tunisassianik avammut annissisinnaaneq unitsikkallarneqartoq
Tamatuma kingunerissavaa takornariat aavernit pisunit tuniaassassianik Kalaallit Nunaannit annissisinnaajunnaanerannik.
Kalaallit Nunaanni najugaqartut aavernit pisunik nammineq pigisaminnik nassarsinnaatitaapput.
Aavernik pisunit avammut tunisassarsornerup unitsinneqarnerallarneranut pissutaavoq, aavernik piniarneq nungusaataanngitsumik ingerlanneqaqqilinngippat aavernit tunisassianik avammut annissinissap illersorneqarsinnaanngitsutut biologinit nalilerneqarmat.
Tamatumunnga pissutaatinneqarpoq pisassiinermi Pinngortitaleriffiup piniakkanik annaasassatut naatsorsuutigisaasa ilaatinneqarsimannginnerat, aavernik uumasooqatigiinnik ataatsinik nungusaataanngitsumik atuinissamut siunnersuutigineqartut sinnerlugit pisaqartoqarsimammat.
Naalakkersuisut naliliineq taanna pimooruttarialittut naliliiffigaat, taamaattumillu 1. august 2016 aallarnerfigalugu piniarnerup nungusaataanngitsumik ingerlaqqilernissaata tungaanut aavernit tunisassianik avammut annisseqqusaajunnaarnermik atuutsitsisoqalissasoq aalajangiipput.
- Pinngortitaq najugarput uumasuilu asseqanngitsuupput. Taamaattumillu aamma akissarsiorfittut pingaaruteqartuupput, meeqqatsinnut ernuttatsinnullu iluaqutaasinnaanissaat qulakkeerniarlugu paarilluartariaqakkavut, Pinngortitamut Avatangiisinullu Naalakkersuisoq Mala Høy Kuko oqarpoq.
Nunat tamalaat isumaqatigiissutaannut CITES-imut Kalaallit Nunaat pisussaaffeqarpoq, uumausnik nujuartanik naasuinillu nunat killeqarfii qaangerlugit niueruteqarnermk nakkutilliinermut atorneqartartumi. Pinngortitaleriffik Kalaallit Nunaanni ilisimartusarnikkut CITES-imut oqartussaasuuvoq.