Aavernit sanalukkat kusanartuliallu nioqqutigineqarunnaarallarnerat ingerlaannassaaq

Aarrit tuugaavinit saarnginillu sanalukkanik kusanartulianillu nioqquteqaqqusaajunnaarallarnerup ingerlaannarnissaa aalajangiunneqarpoq. Piniarnermut Aalisarnermullu Pisortaqarfimmi allaffimmi pisortaq, Ole Heinrich, taama ilisimatitsivoq, EU-p ilisimatusarnikkut ataatsimiititaliaata aallartitai ungasinngitsukkut attaveqarfigereerlugit. Ole Heinrich oqarpoq. Taama pisoqarnissaa ilimagereersimagitsik. Aaverniit sanalukkat kusanartuliallu Europami nioqqutigineqartarnerisa unitsinneqarallarnissaat Storbritanniamit qaammatip uuma aallartilaarnerani qinnutigineqarpoq, ilisimatusarnikkut naliliinerit pereersullu. Aarrit nungusaataasumik nunatsinni piniarneqartarnerat naliliinermi tassani sanioqqunneqarsinnaagunanngilaq. Uumasuninngooq imarmiunik taakkunannga piniartarneq piujuaannartitsinissaq tunaartaralugu ingerlanneqarneq ajormat.

Aarrit tuugaavinit saarnginillu sanalukkat nioqqutigineqaqqusaajunnaarallaraluartut taamaattoq europamiut takornarniatut Kalaallit Nunaanniinnerminni pinnersaatinik pisisarsinnaapput. Kisiannili tassa Europami pisiniarfinnut pisiniartartunullu nioqqutigeqqusaajunnaassapput.

Uumasunik nujuartanik naasunillu nungutaaqqajaasunik niuerneq pillugu Washingtonimi aalajangersakkami, CITES-imi aarrit uumasutut nungutaaqqajaasutut allassimasunut ilaapput. Aarrit tuugaavinik saarngilluunniit sanalunniaraanni akuersissummik qinnuteqaqqaartariaqarpoq, amerlanerujartuinnartullu tamanna atorluarpaat, Avatangiisinut Pinngortitamullu Pisortaqarfimmeersoq, Ellen Sofie Chemnitz, oqaluttuarpoq.

Kalaallit Nunaanni najugaqavissut nuunnerminnut atatillugu aarrit tuugaavinit saarnginillu sanalukkanik nassarsinnaapput. Pinnersaatillu nammineq pigisat nassarnissaat aamma inerteqqutaanngilaq, utilernermili aamma nassarneqaqqittassallutik.