Aaveq sumiissusersivaat
Aarrit arfineq-pingasut sumiissusersiutinik GPS-inik tuugaavisigut nunatta Kitaani ikkussiffigineqarsimasut ilaasa arfineq-marluk nassitsissutaat pissusissamissut nassiussuinngitsut, ilisimatusartut oqaatigigaat, tallimanngormat Radioavisimi oqaluttuaraarput. Ilisimatusartut taamaasiornermikkut neriuutigaat aarrit Kalaallit Nunaanni sumiiffitsik qimakkaangamikku sumukatarnersut paasisaqarfiginissaat.
Sumiissusersiut GPS ataaseq kisimi malittarineqarsinnaasimavoq, taannalu aarrup arnavissap qulinik aqqaneq-marlunnilluunniit ukioqassangatitap tuugaavini ikkusimasuuvoq.
Nutaarsiassaqartitsivilli BBC ullumi nalunaarpoq, aaveq taanna sumiissusersisimagitsik. Ilisimatusartunut oqiliallaataaqisumik paasineqarpoq, aaveq arnaviaq taanna piaqqani ilagalugu kilomerinik 400-nik kimmukarsimasoq, Baffin-Island-imi Ikerup Cumberlandip tungaanut.
Biologip Rune Dietz-ip, Issittuni pissutsinik Ilisimatusarfimmeersup, Kalaallit Nunaanni Pinngortitaleriffik suleqatigalugu aavernik misissuisup, uumasorsuup taassuma sumiissusersinera nuannaarutigeqaa.
- Sikumi manna tikillugu eqqissisimaarsimagunarpoq, eqqissivilluni nerisassarsiorsimassagunarluni, Canadallu tungaanut ingerlaarnera ilimagisatsinnut naapertuuppoq, ilimagigatsigumi Kalaallit Nunaanni arrit Canadamilu aarrit imminnut attuumassuteqarnissaat, Rune Dietz nutaarsiassaqartitsivimmut BBC-mut oqarpoq.
- Ilisimatusarnermut tunngatillugu ajunnginnerusimassagaluarpoq aarrit arlallit paasisaqarfigisuugutsigik, maannali paasisatta takutippaa, eqqortumik ilimasussimasugut, ilimagigatsigumi aarrit Kalaallit Nunaanneereeraangamik aasaanerani Baffin Islandiliartartut, Rune Dietz BBC-mut oqarpoq.
Aarrup arnavissap aqqutaa BBC-p nittartagaatigut malinnaavigisinnaavarsi. Nittartakkatsinni knr naggat gl-imi innersuussissummi taanna nassaarisinnaavarsi.
