Aaveq maanna kangerlummi qassimaarunarpoq
Piniarnermut aalisarnermullu pisortaqarfimmi sulisunit oqaluttuarineqarpoq, siku aarrup qassimaffigisaa Nuup kangerluanut tissukaassimassagunartoq.
![](/sites/default/files/styles/image_934x467/public/article_images/hvalros_jolle_0_0.jpg?itok=Z2gVriD6)
Allattoq Jaaku Lyberth
Nuup eqqaani aavermik siornatigut takunnissimasinnaasunik paasissutissiisinnaasumillu pissarsisoqarsinnaasimanngilaq.
Pinngortitaleriffimmiit eqqoriarneqarpoq aaveq ippassaq takuneqartoq Tunumit imaluunniit Sisimiut eqqaaninngaannit Nuup eqqaanut pisimassasoq.
Qaqutigoorpoq aarrit illoqarfinnut qanillisarnerat. Aaverli inersimasoq tuugaaqarluartoq puttaami qassimalluni Nuummi Qasigiannguit Kimmernallu akornani imartannguamut sisamanngornermi ualilluarnerani tissukaatsippoq.
Taamaalinerani inatsisartut ataatsimiipput aaffattassat oqaluuserineqarlutik. IA sinnerlugu inatsisartuni ilaasortap Kaali Olsen-ip inatsisartut oqaluttarfiannit nalunaarutigaa, Nuummi aavermik takusaqartoqarsimasoq.