Aavartarneq Nuummi sivikillisinneqartariaqarpoq
Nunatta kitaani tuttut pillugit biologit 2006-imut 7-imullu siunnersuinerat ukiuni siuliini siunnersuisarnerinut sanilliullugu allannguuteqangaanngilaq. Oqaatigineqarporli Nuup eqqaani tuttoqarfimmi Ameralimmi tuttut ikileriarujussuarsimasut. Tamannalu pillugu biologit innersuussipput taakani sivikitsuinnarmik tuttunniartoqartariaqartoq taamalu aamma ukiuunerani taakani tuttunniartitsisoqannginnissaanik innersuussillutik.
Tuttoqarfinnili anginerusuni Kangerlussuarmi Sisimiullu akiani Maniitsumilu tuttorpassuaqartoq biologit oqaatigaat.
Tuttoqarfimmili Ameralimmi tuttut ukiut tallimat matuma siorna amerlassusaannut sanilliullugit pingajorarterutaannanngorsimapput.
Kisitsisarnerit takutippaat tuttut ukiut tallimat ingerlaneranni 32.000-t missaanniit 10.000-t missaannut ikileriarsimasut. Taamaalilluni tuttut nerisassaqarniarnerannut naapertuunnerusumik amerlassuseqalerlutik. Ameralimmimi siornatigut tuttorpassuaqarnerata kingunerisaanik nerisassaqarniarnerat eqqarsaatigalugu tuttunik ikilisaasoqarnissaanik biologit siunnersuisarsimagaluarput, maannali tuttut taakani ikilimmata ikilisaasoqarnissaa pisariaaruttoq biologit oqaatigaat.